Mbi 90 milionë ton ushqime të skaduara hidhen çdo vit në Evropë. Një studim i fundit nga Eurobarometri, i kryer nga Komisioni Evropian me 25,500 qytetarë të BE-së, ka treguar se konsumatorët evropianë sillen ndryshe për këtë çështje. Për shembull, 81% e suedezëve mendojnë se është e sigurt të konsumohen ushqimet pas datës së skadencës, ashtu sikurse 75% e finlandezëve dhe 73% e francezëve. Në të kundërt, vetëm 27% e italianëve janë të gatshëm ta bëjnë këtë, ndërsa më skeptikë janë rumunët, bullgarët dhe hungarezët. Por, kush ka të drejtë?
Për të kuptuar më mirë, duhet të dallojmë dy kategori kryesore të datave të skadencës, të cilat shpesh ngatërrohen.
“Të konsumohet deri më”
Kjo shprehje përdoret për ushqime të freskëta dhe që prishen, si qumështi i freskët, kosi, rikota, vezët dhe makaronat e freskëta. Këto produkte kanë një datë skadence strikte, pasi pas kësaj date mund të shfaqen baktere dhe myk që përbëjnë rrezik për shëndetin. Këto ushqime nuk duhen konsumuar pas datës së treguar, për të shmangur probleme të mundshme shëndetësore.
“Preferohet të konsumohet deri më”
Kjo shprehje është më pak rigoroze dhe zakonisht gjendet në produkte si makaronat e thata, orizi, biskotat, konservat, ushqimet në kuti dhe vaji. Pas datës së treguar, këto produkte mund të humbasin cilësitë organoleptike (si ngjyra, shija dhe aroma) dhe disa vlera ushqyese, por ato mbeten të sigurta për konsum.
Ndërsa ushqimet e freskëta duhet të respektohen me rigorozitet për shkak të rreziqeve shëndetësore, produktet me afat më të gjatë ruajtjeje mund të konsumohen edhe pas datës së treguar, duke marrë parasysh ndryshimet e mundshme në cilësi, por jo domosdoshmërisht në siguri. / bota.al
