Gazeta e njohur britanike Daily Mail ka shkruajtur sërish për ariun Tomi, që përdorej në Shqipëri për argëtim nga një restorant.
Ai mbahej në kafaz dhe ushqehej me mbetjet nga tavolinat e klientëve dhe birrë.
Daily Mail bëri një reportazh disa javë më parë për Tomin dhe arinjtë e tjerë që mbaheshin në kafazë për argëtimin e klientëve nga restorante të shumta.
Por të paktën Tomi ka shpëtuar.
Ai u mor të martën herët në mëngjes nga qeveria, për të filluar një jetë të re në rezervat.
“Ai u dërgua në kopshtin zoologjik të Tiranës, duke u kontrolluar nga veterinerët dhe do të udhëtojë përtej kufirit në Kosovën fqinje, ku do të jetë përgjithmonë”, shkruan gazeta.
“Tomi është në gjendje shumë të keqe. Dhëmbët e tij janë dëmtuar rëndë dhe ai ka lëndime në trupin e tij”, tha një ekspert që ekzaminoi gjendjen e ariut.
