42 anijet e Flotiljes e kanë lënë Kretën pas dhe po lëvizin drejt Gazës, ku parashikojnë të mbërrijnë ditën e enjte. «Ndodhen tashmë në ujëra ndërkombëtare», bën të ditur zëdhënësja e delegacionit italian të Global Movement to Gaza, Maria Elena Delia. Gjatë ditëve të pritjes në ishullin grek, «nuk kanë qenë shumë» ata që kanë braktisur misionin, dhe anije të reja janë në nisje për t’u bashkuar me të tjerat.
«Shpresojmë që presionet e këtyre ditëve t’i mbrojnë nga sulmet». Flotilja po «monitorohet» nga dronë të Tel Avivit, tregon Delia. «Këtë herë janë mbajtur lart. Nuk ka pasur sulme».
Por rreziku, tani, rritet në mënyrë eksponenciale sa më shumë që i afrohen objektivit. Dhe të gjithë sinjalet e mbledhura këto ditë i kanë bindur aktivistët se Izraeli do të ndërhyjë shpejt, duke e ndaluar dhe duke u ngjitur në bordin e Flotiljes kur ajo të jetë ende në ujëra ndërkombëtare. Në çdo rast, shumë përpara se të mund të provojë të thyejë bllokadën detare izraelite.
Pikërisht për këtë dhe për pasojat e mundshme u diskutua dje, në Romë, gjatë një turi të gjatë takimesh të aktivistëve me qeverinë dhe opozitat. Dhe u fol për mënyrat si të shmanget më e keqja: ndërmjetësimi mes Flotiljes dhe Kishës për dorëzimin e ndihmave humanitare varet në një fije, por është ende “gjallë”.
Pasi mbërriti në orën 14:30 në Kryeqytet, Delia u drejtua te kazerma e Karabinierëve në zonën e Shën Pjetrit për të takuar ministrin e Mbrojtjes Guido Crosetto, së bashku me disa anëtarë të Global Movement. Asaj iu ritheksua — siç kishte bërë një mbrëmje më parë në telefon edhe ministri i Jashtëm Antonio Tajani — se Alpino, fregata e Marinës që po ndjek Flotiljen, nuk do të ndërhyjë në rast sulmi. Ajo do të ofrojë vetëm asistencë, nëse duhet. Dhe nuk do t’i shoqërojë anijet në ujëra që Izraeli i konsideron zonë lufte. Crosetto, duke folur me aktivistët, u shfaq i vetëdijshëm se objektivi i misionit është «të ndihmojë popullin e Gazës, por është thelbësore që ky angazhim të mos përkthehet në akte që nuk do të sillnin asnjë rezultat konkret dhe që, përkundrazi, do të rrezikonin pasoja dramatike me rreziqe të larta dhe të pamenduara».
Si, për shembull, ideja për të kapërcyer bllokadën detare izraelite. Në atë rast, tha shumë qartë ministri, «Flotilja do t’i ekspozohej rreziqeve shumë të larta dhe të pakontrollueshme».
Po bëhet një përpjekje e fundit për të shmangur skenarin më të keq. Negociata me Kishën parashikon që ndihmat humanitare të zbriten në Qipro dhe t’i dorëzohen Patriarkatit Latin të Jerusalemit. Papa Leone ka kontakte të drejtpërdrejta dhe të vazhdueshme me Patriarkun e Jerusalemit, Pierbattista Pizzaballa, i cili është vënë në dispozicion për të shërbyer si garant në Qipro, ku Patriarkati është i pranishëm me katër famulli. Farnesina dhe Quirinale po ndjekin nga afër ecurinë e negociatave.
Aktivistët duan megjithatë garanci se Izraeli nuk do të ketë akses në ndihmat humanitare dhe nuk do të mund të vendosë asnjë lloj filtri në shpërndarje. Qeveria e Netanyahut, deri tani, ishte shprehur vetëm e gatshme të merrte përsipër menaxhimin e tyre, sapo të zbrisnin në Qipro. Duhet, pra, të pranojë të humbasë kontrollin mbi atë që hyn në Gaza.
Drejtuesia e Flotiljes do ta diskutojë këtë në orët e ardhshme, në një klimë tensioni ekstrem. «Sulmi i ardhshëm do të jetë vdekjeprurës», thotë Stefano Bertoldi, komandant i Zefiro, një prej anijeve të Flotiljes që kishin qenë nën sulm nga dronët. «Me shumë gjasë do të ketë të plagosur, ndoshta edhe të vdekur». / bota.al
