Dje Organizata Botërore e Shëndetit paralajmëroi që koronavirusi i ri mund të mos largohet kurrë nga jetët tona.
Aktualisht i dërguari i posaçëm i UN për Covid-19 ka thënë se bota duhet të mësohet me kufizimet dhe se jeta mund të mos kthehet më në atë mënyrë siç ishte më parë. Ai paralajmëroi gjithashtu se gjetja e një vaksine dhe imunizimi në masë do të ishte një proces i gjatë.
“Ne do ta adaptojmë sjelljen tonë për të minimizuar kërcënimet që ky virus shkakton,” tha Dr David Nabarro në një intervistë me BBC.
“Ne e dimë se ka disa vende ku ky proces do të jetë veçanërisht i ndërlikuar. Por ne do të mësojmë të argëtohemi, të bëjmë punën tonë, të shoqërohemi dhe të qëndrojmë me familjet tona – dhe në thelb kjo mënyrë e re e ndërveprimit do të jetë pjesë e jetës sonë , ”shpjegoi ai.
