Quhen të vrasës të famshëm, jo sepse shifrat e viktimave që kanë lënë pas i kalojnë mijërat, por kanë vrarë vetëm nga një person. Ama, jo persona të zakonshëm, por ata që drejtonin botën duke ndryshuar historinë e botës me këto vrasje.
Përzgjedhja e vrasësve të përfshirë në këtë listë është bërë mbi bazën e disa kritereve: vrasësi duhet të kishte kryer të paktën një vrasje të suksesshme; duhet të kishte rëndësi politike ose kombëtare dhe duhet t’i kishte kryer, jo domosdoshmërisht, i/e vetëm.
10. John Wilkes Booth
Është vrasësi i presidentit amerikan Abraham Lincoln, të kryer më 14 Prill 1865 në Teatrin Ford në Washington DC. Booth ishte një aktor dhe simpatizant i Konfederatës, i cili konspiroi me shumë të tjerë për të vrarë Lincolnin, zëvendëspresidentin Andrew Johnson, dhe sekretarin e shtetit William H. Seward. Besohej se vdekja e Lincolnit dhe dy pasardhësve të tij të parë do të rrëzonte qeverinë ekzistuese dhe do lejonte krijimin e Qeverisë së Konfederatës. Lincolni ishte presidenti i parë amerikan që u vra. Të tjerët janë James Garfield, William McKinley dhe John Kennedy. Booth përdori një armë të kalibrit 44, me të cilën e qëlloi Lickolnin pas kokës. Por, vrasja e tij nuk solli efektin që pritej, ndërsa Lincoln vazhdon të jetë një nga presidentët më frymëzues të historisë amerikane.
9. Balthasar Gerard
Balthasar Gerard është personi që vrau Princin William I, të kontesë Nassau (i njohur ndryshe edhe si princi i heshtur) më 10 Korrik të 1584. Princi William ishte i rëndësishëm gjatë luftës holandeze për pavarësi nga mbretëria e Spanjës në Holandë. Ai ishte drejtpërdrejt i përfshirë (financiarisht dhe si lider) në betejat që shënuan fillimin e Luftës tetë vjeçare. Gerard, një francez katolik dhe përkrahës i Filipit të II-të besonte se Williami kishte tradhtuar mbretin spanjoll, gjithashtu dhe fenë Katolike. Gerardi e qëlloi Williamin në kraharor pranë shtëpisë së tij. Historianët besojnë së Williami është kreu i parë i shtetit në botë që është vrarë me armë zjarri. Dhe, nga ky këndvështrim, vrasësi Balthasar Gerard hyn në listën e dhjetë vrasësve më të njohur të historisë.
8. Gavrilo Princip
Vdekja e dukës Franz Ferdinand të Austrisë nga duart e Principit ishte shkaku i shpërthimit të Luftës Parë Botërore. Qëllimi politik i vrasjes së tij ishte ndarja e provincave jugore nga Austria dhe formimi i një vendi të vetëm (Serbia e Madhe). Atentatorët i zunë pritë autokolonës së dukës Ferdinand. Gjatë atentatit makina e dukës arriti t’i shpëtonte sulmit, duke bërë që ai të largohej pa u dëmtuar. Ndërkohë që ai po përpiqej të largohej nga qyteti, shoferi i tij mori një kthesë të gabuar, pa qenë në dijeni se po ecte në drejtim të Gavrilo Princip. Ky i fundit qëlloi dy herë mbi makinën dukës, duke goditur dhe vrarë jo vetëm dukën Ferdinand, por edhe gruan e tij Sofia. Siç e theksuam më lart, kjo vrasje nisi një nga luftërat më të përgjakshme të historisë së njerëzimit, ku mbetën të vrarë miliona njerëz.
7. Jan Kubis dhe Jozef Gabcik
Reinhard Heydrich ishte komandanti i Policisë Sekrete Gjermane gjatë Luftës II Botërore. Më 27 Shtator të 1941, Heydrich u caktua guvernator ushtarak i Protektoratit të Çekosllovakisë. Që ishte e pushtuar nga nazistët. Brutaliteti dhe mizoria e tij bënë që ai të etiketohej me emra të tillë si Kasapi i Pragës, Bisha apo Xhelat. Heydrich ishte aq i “suksesshëm” në misionin e tij, aq sa Hitleri vendosi ta caktonte guvernator në Paris. Kur Inteligjenca britanike mësoi mbi këtë fakt, ata vendosën se Heydrich duhej eliminuar me çdo kusht. Në këtë kuadër, britanikët stërvitën dy ushtarë çekë, Jan Kubis dhe Jozef Gabcik, për të vrarë Heydrichin. Ata sulmuan makinën e tij më 27 Maj 1942. Heydrich vdiq 11 ditë më vonë nga mbetjet e plumbave që kishte në trup. Ky ishte suksesi i vetëm i Aleatëve për vrasjen e një figurë të madhe naziste gjatë Luftës.
6. Charlotte Corday
Vrasësja e Jean-Paul Marat më 13 Korrik të 1793, i cili ishte një figurë kryesore gjatë Revolucionit Francez dhe u konsiderua martir për kauzën e tij. Përkrahja që ai i dha Masakrës së Shtatorit dhe pjesëmarrja në fillimin e Mbretërisë së Terrorit prishi reputacionin e tij dhe filloi të shihej si një mostër i Perandorisë. Corday u dënua nga publiku për vrasjen e Maratit, edhe pse gjatë Perandorisë së Dytë ajo u pa si heroinë. Marat kohët e fundit kishte një sëmundje lëkurë dhe rrinte shpesh në një banjo të ftohtë. Dhe, ndërsa ai ishte në një banjo të tillë, Corday e goditi Maratin me një thikë buke në kraharor, duke i çarë mushkërinë dhe aortën. Charlotte Corday hyn në këtë listë për rëndësinë e madhe që pati në botë Revolucioni Francez. Plus që ajo është një ndër të vetmet femra vrasëse në histori.
5. Nathuram Godse
Vrasës i Mahatma Gandhit më 30 Janar 1948. Gandhi është një ndër figurat kryesore të historisë së Indisë, dhe shumë i famshëm në botë për mënyrën e të protestuarit të tij paqësisht që tani ndiqet shumë dhe ka hyrë në histori me emrin “Gandhizëm”. Vrasësi i tij Godse ishte një anëtar i një organizate nacionaliste indiane, kundërshtare e Komunitetit Mysliman dhe Kongresit Kombëtar Indian. Arsyeja e vrasjes përgjithësisht lidhet me përkrahjen që Gandhi dha për ndarjen e Indisë dhe dobësimin që pësoi ajo, pas insistimit që India të paguante Pakistanin. Godse besonte se Gandhi po sakrifikonte interesat e indianëve në një përpjekje për të kënaqur grupet minoritare. Godse e vrau Gandhin gjatë shëtitjes së tij në mbrëmje. Ai ju afrua Gandhit, e përshëndeti atë dhe më pas e qëlloi tre herë me një pistoletë.
4. Felix Yusupov
Kjo është vrasja më e çuditshme dhe më interesante e historisë. Më 16 Dhjetor të 1916, një grup fisnikësh të udhëhequr nga princi Yusupov vranë Gregori Rasputinin. Sipas legjendës, Rasputin u helmua, qëllua dhe u hodh në një lumë ku përfundoi i vdekur. Atentatorët, pasi vendosën se Rasputini përbënte një kërcënim për perandorinë, fillimisht e helmuan atë me cianid (që mund të vriste 7 veta). Por, pasi helmimi për çudi nuk dha efekt, Yusupov e qëlloi atë me pistoletë. Yusupov, pasi la trupin e tij në dhomë, shkoi të konsultohej me të tjerët se çfarë do bëhej me të. Kur u kthyen në vendin e krimit, Rasputin – ende gjallë – kapi Yusupovin nga fyti dhe më pas u përpoq të largohej. Teksa largohej, ai u qëllua dhe tre herë të tjera duke e lënë të vdekur.
3. Le Harvey Oswald
Ndoshta vrasja më e debatueshme në histori është ajo e presidentit amerikan John Kennedy më 22 Nëntor 1963, nga Oswald. Një marksist i betuar, Oswald ishte një marins i cili emigroi në Bashkimin Sovjetik në Tetor të 1959. Në 1962 ai u rikthye në SHBA, ku kuptoi se jeta në Bashkimin Sovjetik kishte qenë shumë më mirë se në Amerikë. Pasi tentoi të kryente punë të ndryshme, Oswald përfundoi duke vrarë Kennedyn. Ai e qëlloi Kennedyn nga kati i gjashtë i ndërtesës ku punonte, ndërkohë që autokolona e presidentit po kalonte aty pranë. Arma e përdorur për vrasjen ishte një automatik. Për këtë vrasje konspiracionet nuk kanë fund. Por të gjithë janë të një mendje që: Oswald (që u vra para se të depononte) u ndihmua nga njerëz me pozitë të larta.
2. Andrey Lugovoy
Lugovoy është personi që besohet se ka helmuar spiunin rus Alexander Litvinenko me polonium, më 1 nëntor të 2006. Lugovoy hyn në këtë listë, sepse Litvinenko është viktima e parë e njohur, i shkaktuar nga sindroma e rrezatimit akut ose helmimi rrezatues e quajtur ndryshe “vrasja e parë nukleare”. Litvinenko mendohet se është helmuar ndërkohë që pinte çaj me Lugovoyn. Litvinenko ishte kritik i ashpër i qeverisë ruse dhe presidentit rus Vladimir Putin, dhe në atë kohë po hetonte vdekjen e Anna Politkovskaya, një gazetare ruse e njohur për kundërshtimin ndaj administratës së Putinit, e cila u gjet e vrarë në 2006. Vrasja e Litvinenkos solli një acarim mes Perëndimit dhe Rusisë. Kjo e fundit nuk e pranoi kurrë që ishte pas vrasjes.
1. Markus Julius Bruti
Vrasja më e famshme në histori është pikërisht ajo e kryer nga Bruti. Bruti, dhe shumë njerëz të tjerë, qëlluan me thikë perandorin e Romës Jul Cezarin, më 15 Mars, 44 Para Krishtit. Jul Cezari ishte diktatori ushtarak i Romës duke filluar që nga viti 50 Para Krishtit, por marrëdhënia e tij me Senatin e Romës ishte konfliktuese. Bruti, një mik i tepër i ngushtë i Jul Cezarit, por njëkohësisht ishte edhe Senator, konspiroi me senator të tjerë për të vrarë atë, pasi kishin frikë se pushteti i tij, që po rritej gjithmonë e më shumë, mund të nxirrte senatin “jashtë loje”. Supozohet se fjalët e fundit të tij, ndërkohë që po goditej me thika, ishin: “Et tu Brute?”, që përkthehen “Edhe ti Brut?”. Pasi Cezari kishte një besim të verbër të Brut dhe nuk e priste të tradhtohej nga miku i tij. Kjo frazë tashmë ka hyrë në histori. /Tirana Observer/
