Jo vetëm krizë qeveritare dhe rënie në bursa, por edhe goditje e rendit liberal politik dhe ekonomik.
- Kriza qeveritare
Përveç se do i japë një goditje të fortë ekonomisë së Britanisë, pasoja e parë do të jetë një krizë qeveritare. David Cameron tashmë ka dhënë dorëheqjen si Kryeministër dhe si udhëheqës i Partisë Konservatore.
Nëse nuk menaxhohet me kujdes, ky proces do të dëmtojë marrëdhëniet mes Londrës dhe kryeqyteteve të tjerë të BE. Këta të fundit do e interpretojnë votën pro daljes si një goditje të rëndë ndaj unitetit europian. Për hir të ruajtjes së atij uniteti, nuk do të ketë shenja bujarie nga ana e tyre, për marrëveshjet pas Brexit me Britaninë.
2. Tregjet financiare
Së dyti, Brexit do i bëjë tregjet financiare më të ndjeshme ndaj dobësive të eurozonës 19-anëtarëshe. Stërlina ka pësuar një rënie rekord në 30 vite.
Investitorët do të pyesin nëse, pas tronditjes së Brexit, qeveritë e eurozonës do të kenë vullnetin politik dhe mbështetjen publike për të forcuar arkitekturën e unionit monetar europian.
3. Lëvizjet politike kundër “establishment”-it
Lëvizjet politike, sidomos partitë e të djathtës ekstreme në Europën perëndimore do të marrin frymëzim nga Brexit. Ndër më të galvanizuarit do të jetë Fronti Nacional në Francë, udhëheqësja e të cilit, Marine Le Pen, synon vendin e presidentes në zgjedhjet e vitit të ardhshëm.
4. Integrim më i fortë
BE do të gjendet nën presion për propozime për një integrim më të ngushtë. Një plan si ai i vitit që kaloi, “Raporti i Pesë Presidentëve”, i cili mblodhi shumë shpejt pluhur në Bruksel, nuk do të mjaftojë.
Nëse një bashkim më i fortë ekonomik dhe monetar nuk është i arritshëm, francezët dhe gjermanët do të paraqesin plane për më shumë bashkëpunim, në fusha si mbrojtja dhe siguria e brendshme.
5. Ekuilibri i brendshëm
Në fund, Brexit do të prishë ekuilibrin e brendshëm në BE. Me Britaninë jashtë, shtatë anëtarët e bllokut që nuk kanë adoptuar Euron do të zënë vetëm 15% të prodhimit të BE, kundrejt më shumë se 30 % që zinin kur Britania ishte anëtare.
Brexit do të rrisë supremacinë politike dhe ekonomike të Gjermanisë në BE – një gjë që as Berlini dhe as partnerët e tij nuk e mirëpresin. Brexit do të dëmtojë kohezionin e BE, vetëbesimin dhe reputacionin ndërkombëtar.
Kështu që, pasoja më e madhe është se Brexit do të dëmtojë rendin politik dhe ekonomik liberal, të cilin e përfaqësojnë Britania, BE dhe aleatët dhe miqtë e tyre kudo në botë.
bota.al
