Presidenti rus Vladimir Putin, gjatë gjithë kësaj kohe ka luajtur një lojë agresive shahu kundër Perëndimit. Çfarë kërkon të arrijë? Më poshtë është gjithçka që duhet të dini:
Sa i fuqishëm është Putini? Në Rusi, Vladimir Vladimirovich Putin, 64 vjeç, sundon si një car, me një kontroll pothuaj total të vendit. Ish-agjent i KGB-së, Putini është një strateg gjeopolitik me vetë-disiplinë të lartë dhe plot sekrete, që ndryshe nga shumica e burrave rusë, nuk pi fare. Ai udhëheq mbi një kult personaliteti, që duket qesharak për të huajt – pamjet e tij lakuriq nga mesi e lart mbi kalë, ndjekja e një tigri siberian, apo zhytja në Detin e Zi për të tërhequr objekte të lashta, janë të zakonshme në mediat ruse. Por nacionalizmi i tij macho u pëlqen shumë rusëve, të cilët janë të dëshiruar për një udhëheqës të fortë, pas kaosit që mbretëroi në vijim të shembjes së Bashkimit Sovjetik. Regjimi i Putinit është i ndërthurur thellë me industrinë e naftës ruse dhe oligarkët miliarderë të vendit… Si erdhi në pushtet? Nëpërmjet punës së FSB-së, pasardhëse e KGB-së sovjetike. Putin ishte një operativ i panjohur i FSB-së, kur agjencia detyroi presidentin e sëmurë Boris Jelcin, që ta zgjidhte si kryeministër në gusht të vitit 1999…
