Qeveria spanjolle ka konfirmuar se përdorimi i maskave për fytyrën do të jetë e detyrueshme që nga e enjtja në zonat e mbyllura dhe në rrugë kur nuk mund të ndiqen protokollet e kërkuara për distanca sociale prej 2 metrash.
Teksa fëmijët mbi gjashtë vjeç do të përjashtohen nga urdhri, maska rekomandohet për fëmijët e moshës nga tre deri në pesë vjeç. Njerëzit me vështirësi në frymëmarrje gjithashtu janë të përjashtuar nga përdorimi i saj.
Fernando Simón, kreu i qendrës së Spanjës për raste urgjente shëndetësore, tha se masa kishte për qëllim të mbronte si atë që e mban, ashtu edhe ata përreth.
“Rregullat nuk janë aq të komplikuara: ju duhet të mbani një distancë nga të tjerët rreth 2 metra,” tha ai. “Nëse logjikisht, jeni në rrugë dhe e keni kuptuar që nuk do të jetë e mundur, ju vendosni maskën tuaj dhe kjo është e gjitha.”
Deri më tani, maskat në fytyrë – të cilat po shpërndahen në stacionet e trenit dhe metrosë – kanë qenë të detyrueshme vetëm për transportin publik.
Kryeministri i Spanjës, Pedro Sánchez, iu drejtua deputetëve në kongres të mërkurën në mëngjes për të kërkuar miratimin e tyre për një zgjatje të situatës së jashtëzakonshme të vendit.
Ai kërkoi falje për gabimet që kishte bërë koalicioni i tij i udhëhequr nga Socialistët gjatë pandemisë, por tha se përparimi i bërë gjatë dy muajve të fundit duhej të konsolidohej me një shtrirje tjetër të një prej bllokimeve më të rrepta të Evropës, shkruan the Guardian.
“Janë njerëzit që e kanë mundur kurbën,” tha ai. “Spanjollët janë mbledhur për të ndaluar virusin dhe askush nuk ka të drejtë të shkatërrojë atë që kemi arritur me bllokimin.”
Argumentet e tij u sulmuan nga Pablo Casado, udhëheqësi i partisë konservatore të Popullit.
“Ju po përpiqeni të na bëni që të zgjidhni midis jush dhe kaosit, por kjo është e pamundur sepse vetë ju jeni kaos,” tha Casado. “Ju nuk keni asnjë mënyrë për të mbrojtur popullin spanjoll, përveç se me këtë mbyllje brutale.”/bota.al/
