Lëshimi i shtatë i anijes ambicioze hapësinore Starship të SpaceX, drejtuar nga vizionari Elon Musk, duhej të ishte një hap i rëndësishëm drejt të ardhmes së eksplorimit hapësinor dhe misioneve në Hënë. Megjithatë, testi përfundoi me një shpërthim spektakolar në qiellin e Boca Chica, në jug të Teksasit.
Pjesa e parë e raketës, Super Heavy, funksionoi shkëlqyeshëm për dy minuta e gjysmë. Më pas, sipas planit, u shkëput dhe u kthye me sukses në tokë, duke u rivendosur me saktësi në kullën e lëshimit – një arritje që u përsërit nga testi i pestë i realizuar vjeshtën e kaluar.
Ndërkohë, vetë anija hapësinore Starship ndezi gjashtë motorët e saj me metan, duke nisur një udhëtim që ishte planifikuar të përfundonte me një ulje të butë në Oqeanin Indian pas 66 minutash. Por, disa minuta pas ngritjes, motorët ndaluan së dërguari sinjale funksionimi, dhe qielli u ndriçua nga pamja e një shpërthimi.
Shkaku i kësaj ngjarjeje mbetet ende i paqartë. Megjithatë, ky është një dështim i rëndë që pritet të ketë pasoja të rëndësishme për projektet e ardhshme të SpaceX.
Anija Starship e përdorur për këtë fluturim përfaqësonte një model të ri, pothuajse identik me atë përfundimtar që do të përdoret për misionet në Hënë. Krahasuar me modelet e mëparshme, ky version i ri ishte zgjeruar në gjatësi deri në 123 metra – e barabartë me një ndërtesë 40-katëshe – dhe kishte një kapacitet më të madh karburanti.
Për më tepër, inxhinierët kishin përmirësuar sistemet e saj, duke instaluar një kompjuter më të fuqishëm, një sistem mbrojtjeje termike më të avancuar dhe 30 kamera për të monitoruar sjelljen e pikave kritike të strukturës. Gjithashtu, gjatë fluturimit do të simulohej lëshimi i disa satelitëve të rinj Starlink.
Fatkeqësisht, misioni nuk shkoi sipas planit. Ky dështim mund të ndikojë mbi programin Artemis të NASA-s, që synon rikthimin e astronautëve në Hënë. Në vitin 2027, NASA kishte planifikuar uljen e një ekuipazhi njerëzor pikërisht me anijen Starship, por më parë ajo duhet të demonstrojë një ulje të suksesshme pa njerëz në bord.
Elon Musk dhe ekipi i tij tani do të analizojnë të dhënat e regjistruara për të identifikuar problemet dhe për të përcaktuar nëse ato mund të kapërcehen lehtësisht.
Ironikisht, konkurrenti Jeff Bezos, pas suksesit të lëshimit të raketës së tij të re New Glenn, i kishte dërguar një mesazh urimi Elon Musk-ut: “Suksese sot @elonmusk dhe gjithë ekipit të SpaceX.” Por fjalët e tij nuk arritën të shmangin fatkeqësinë. / bota.al
