Presidenti Donald Trump ka firmosur një urdhër ekzekutiv për të shtyrë më tej ndalimin e TikTok në SHBA. Në një deklaratë të shpërndarë disa orë pasi bëri betimin të hënën, më 20 janar, Trump njoftoi se po i jepte TikTok edhe 75 ditë të tjera para se të hynte në fuqi një ligj që ndalon platformën e mediave sociale në SHBA.
Ligji, me titullin zyrtar Akti për Mbrojtjen e Amerikanëve nga Aplikacionet e Kontrolluara nga Kundërshtarët e Huaj, rregullon “aplikacionet e kontrolluara nga kundërshtarët e huaj,” specifikisht ato që operohen nga TikTok dhe çdo degë tjetër e kompanisë mëmë me bazë në Kinë, ByteDance Ltd., për arsye të sigurisë kombëtare.
Trump tha në deklaratën e tij se shtyrja e ndalimit do t’i jepte administratës së tij mundësinë për të mbrojtur sigurinë kombëtare “duke shmangur një mbyllje të papritur të një platforme komunikimi të përdorur nga miliona amerikanë.”
Trumpi kishte njoftuar më 19 janar se synonte të lëshonte një urdhër ekzekutiv për të shtyrë ndalimin federal të TikTok dhe për ta mbajtur atë aktiv, pas një plani të tij fillestar për të ndaluar aplikacionin e mediave sociale gjatë mandatit të parë në prill 2020.
Urdhri i tij ekzekutiv në atë kohë ndalonte “çdo transaksion” me ByteDance për 45 ditë, me presidentin që përmendi shqetësime në rritje për sigurinë dhe një model censure. “Këto rreziqe janë reale,” tha Trump gati katër vite më parë në një vendim që e la TikTok “të tronditur.”
Përpara se të bënte betimin për mandatin e tij të dytë, Trump shkroi në Truth Social se të hënën do të “lëshonte një urdhër ekzekutiv për të zgjatur periudhën përpara se ndalimet e ligjit të hyjnë në fuqi, në mënyrë që të mund të arrijmë një marrëveshje për të mbrojtur sigurinë kombëtare.”
“Urdhri gjithashtu do të konfirmojë se nuk do të ketë përgjegjësi për asnjë kompani që ndihmoi në mbajtjen e TikTok në funksion përpara urdhrit tim,” shkroi ai. “Amerikanët meritojnë të ndjekin Inaugurimin tonë emocionues të hënën, si dhe evente dhe diskutime të tjera.”
Trump ndau gjithashtu një “ide fillestare” që SHBA të zotërojë 50% të TikTok përmes një “sipërmarrjeje të përbashkët” midis pronarëve aktualë të aplikacionit dhe/ose pronarëve të rinj.
“Duke vepruar kështu, e shpëtojmë TikTok, e mbajmë në duar të sigurta dhe i lejojmë të vazhdojë funksionimin,” shkroi ai. / bota.al
