Philip Elliott
Natën kur Donald Trump rimori Presidencën, ai e ftoi menaxheren e fushatës, Susie Wiles, të dilte në podium për të marrë duartrokitjet. Ajo refuzoi.
Kur ekipi i tij u zhvendos në Harvard për një takim dyditor publik mbi fushatën, ndihmësja kryesore e Trump-it qëndroi në Florida.
Dhe kur po përgatitej të hynte në zyrën e saj në Krahun Perëndimor, Wiles e përsëriti disa herë se nuk kishte durim për këdo që kërkonte të bëhej yll. “Unë dhe ekipi im nuk do të tolerojmë thashetheme, dyshime të papërshtatshme apo drama. Këto janë kundërproduktive për misionin,” i tha ajo Axios-it përpara Ditës së Inaugurimit.
E gjitha kjo bie në kontrast të fortë me imazhin e Wiles që doli papritur të martën, pas një serie prej 11 intervistash me një studiues të rolit të shefave të stafit të Shtëpisë së Bardhë, të publikuara nga Vanity Fair. Në to, Wiles flet me një sinqeritet të jashtëzakonshëm, dhe ndoshta pa u kujdes shumë për protokollin, për Trump-in dhe ekipin që ajo drejton në emër të tij.
Ndërsa Trumpi e ka quajtur “zonja e akullt”, ajo e përshkroi atë si një person me “personalitet alkooliku”, në kuptimin se “vepron me bindjen se nuk ka asgjë që nuk mund ta bëjë”. (Trump, siç dihet, nuk pi alkool.) Dhe ndërsa Trump e ka cilësuar vazhdimisht si “gruan më të fuqishme në botë”, ajo ia ktheu komplimentin duke pranuar se ai gabon, shumë herë.
Për dikë që predikon një moto që do t’i shkonte më shumë ekipit “pa dramë” të Obamës, Wiles i shtoi jo pak erëza gjellës politike të Uashingtonit me këto biseda, herë nga zyra e saj e herë nga lavanderia e shtëpisë. “Nuk e kërkoj kurrë vëmendjen,” tha ajo në një nga intervistat.
Ndoshta. Por zbulimet e saj e hodhën Uashingtonin në lojën e zakonshme të hamendësimeve: sa do të qëndrojë Wiles në detyrë dhe çfarë loje po luan ajo? Në fund të fundit, gjatë katër viteve të para të Trump-it, Shtëpia e Bardhë ndërroi katër shefa stafi, dhe tri fushatat e tij dukeshin vazhdimisht në rindezje, me personalitete rivale që shfaqeshin si “të parët mes të barabartëve”. Dhe Wiles, një lobiste e zgjuar me bazë në Florida, rrallë bën lëvizje të pamenduara.
Megjithatë, Trumpi kënaqet me këtë lloj drame. Ish-prezantuesi i reality show-ve nuk i ndëshkon njerëzit kur kundërshtojnë axhendën e tij, por kur u atribuohet merita për formësimin e saj. Pikërisht këtu, Wiles mund të ketë fituar pikë: komentet e saj e portretizojnë administratën si të drejtuar nga urdhrat e Trump-it. Edhe kur tregon qëndrim sfidues, ajo mbetet mbi të gjitha zbatuesja e vullnetit të tij, duke vepruar sipas dëshirave të tij edhe kur nuk pajtohet me to.
Për tarifat, Wiles tha se kishte pasur një mosmarrëveshje të madhe mbi mënyrën e ecjes përpara. Trumpi i shpalli ato gjithsesi.
Për hakmarrjen ndaj kundërshtarëve politikë, ajo tha se kishte një marrëveshje të vagullt që ai do të qetësohej pas rreth 90 ditësh në Shtëpinë e Bardhë. Kjo nuk ndodhi.
Për faljen e 1.500 personave të dënuar për rolin e tyre në sulmin ndaj Kapitolit më 6 janar 2021, ajo tha se ishte mbivotuar.
Për shpërbërjen e Agjencisë Amerikane për Zhvillim Ndërkombëtar (USAID), tha thjesht se ishte e tronditur.
Dhe për sagën e vazhdueshme të financierit të diskredituar dhe të dënuar për krime seksuale, Jeffrey Epstein, Wiles tha se Trumpi gabonte kur vazhdonte të pohonte se ish-presidenti Bill Clinton kishte rol në skandal. Ndërkohë, Trumpi përmendet në dosje, pranon Wiles, duke shtuar se nuk ka asgjë të dyshimtë.
Nga ana e saj, Wiles deklaroi të martën se autori, Chris Whipple, kishte nxjerrë deklaratat e saj jashtë kontekstit dhe kishte lënë jashtë vlerësimet pozitive për Trump-in dhe ekipin e tij. Sipas saj, ishte një “artikull sulmues”. Shtëpia e Bardhë këmbënguli se Wiles vazhdon të gëzojë besimin e Trump-it.
Megjithatë, Wiles nuk mohoi asnjë nga citimet e saj, përfshirë cilësimin e zëvendëspresidentit J.D. Vance si një “teoricien konspiracioni” që iu bashkua lëvizjes së Trump-it vetëm nga interesi, sugjerimin se ish-këshilltari i Trump-it, Elon Musk, përdorte mikrodoza ketamine kur postonte deklarata nxitëse në X, dhe akuzën ndaj prokurores së përgjithshme Pam Bondi se e kishte keqmenaxhuar historinë Epstein.
Këto momente dukshëm të pakontrolluara i dhanë jetë asaj që shumë në Uashington tashmë e dyshonin ose e dinin nga afër. Por Trumpi e urren t’u japë kundërshtarëve një fitore dhe çdo gjë më pak se mbrojtja e Wiles do të binte ndesh me mënyrën e tij të veprimit. Në fund të fundit, kur këshilltari i tij i parë për sigurinë kombëtare këtë mandat u kritikua për dërgimin gabimisht të informacionit të ndjeshëm mbi operacione ushtarake te një gazetar, ai u dërgua në OKB.
Megjithatë, momenti i zbulimit të Wiles ishte një shkëputje e fortë nga imazhi i ndihmëses së heshtur që Trumpi ftoi të fliste natën e fitores në klubin e tij në Florida. “Susie pëlqen të qëndrojë disi në prapaskenë,” tha Trumpi. “Zonja e akullt. Kështu e quajmë.”
Tani, ajo mund ta gjejë veten të lënë në akull, të paktën për një kohë të shkurtër, ndërsa të gjithë përpiqen të kuptojnë sa do të zgjasë shkrirja. / Time – Bota.al
