Mjekët në Itali kanë raportuar provat e para të një lidhjeje midis Covid-19 dhe një çrregullimi të rrallë por serioz inflamator tek fëmijët.
Të martën, mjekët në Spitalin e fëmijëve Evelina London njoftuan vdekjen e një djali 14-vjeçar, fataliteti i parë i njohur nga kjo gjendje në Britani.
Fëmijët e shtruar në të gjithë vendin po marrin trajtimin e duhur. Simptomat tipike përfshijnë ethe, skuqje të lëkurës, sy të kuq, buzë të plasaritura dhe dhimbje barku. Mjekët dyshuan që koronavirus luan një rol në çrregullimin e ri duke shkaktuar një reagim të tepruar imunitar te fëmijët, por nuk kishte asnjë provë që të dyja ishin të lidhura.
Provat e fundit vijnë nga mjekët në Bergamo, qyteti me nivelin më të lartë të infeksioneve dhe vdekjeve nga koronavirus në Itali. Regjistrimet mjekësore në spitalin Papa Giovanni XXIII treguan se që kur shpërthimi arriti në Bergamo, rastet e sëmundjes së ngjashme me Kawasaki u rritën.
“Studimi ynë ofron provat e para të qarta të një lidhje midis infeksionit Sars-CoV-2 dhe kësaj gjendje inflamatore, dhe shpresojmë se do të ndihmojë mjekët në të gjithë botën teksa përpiqemi të luftojmë me këtë virus të panjohur,” tha Dr Lorenzo D ‘Antiga, drejtor i shëndetit të fëmijëve në spital. “Nuk kam dyshim se sëmundja Kawasaki në këta pacientë është shkaktuar nga Sars-CoV-2.”
Dr Annalisa Gervasoni, specialiste pediatrike në spital, tha: “Sipas përvojës sonë, vetëm një pjesë shumë e vogël e fëmijëve të infektuar me Sars-CoV-2 zhvillojnë simptoma të sëmundjes Kawasaki. Sidoqoftë, është e rëndësishme të kuptohen pasojat e virusit tek fëmijët, veçanërisht pasi vendet në mbarë botën po bëjnë plane për të filluar lehtsimin e masave të izolimit. ”
Sëmundja Kawasaki, e cila prek jashtëzakonisht shumë foshnjet, shkakton inflamacion të enëve të gjakut dhe në disa raste ënjtje të zemrës. Trajtimi i shpejtë mund të parandalojë aneurizmat koronare potencialisht vdekjeprurëse. The Guardian / bota.al
