Shtetet e Bashkuara i kanë kërkuar Organizatës Botërore të Shëndetësisë që të mos marrë parasysh presionin kinez dhe ta ftojë Tajvanin në mbledhjen vjetore, në të cilën do të diskutohet për pandeminë e koronavirusit. Vetë Shtetet e Bashkuara nuk e kanë konfirmuar ende pjesëmarrjen në bisedimet e 18-19 majit të Asamblesë Botërore të Shëndetit, pasi Presidenti Donald Trump u zotua të shkurtojë fondet për organin e OKB.
Sekretari i shtetit i SHBA, Mike Pompeo u tha gazetarëve: Dua t’u bëj thirrje të gjitha kombeve, përfshirë ato në Evropë, të mbështesin pjesëmarrjen e Tajvanit si vëzhgues në Asamblenë Botërore të Shëndetit dhe vendet e tjera përkatëse të Kombeve të Bashkuara. Unë gjithashtu i bëj thirrje Drejtorit të Përgjithshëm të OBSH-së Tedros (Adhanom Ghebreyesus) të ftojë Tajvanin të vëzhgojë OBSH këtë muaj, pasi ai ka fuqinë për të bërë këtë, siç e kanë bërë paraardhësit e tij në shumë raste.
Kina, e cila ka një veto në Këshillin e Sigurimit të UN, e konsideron Tajvanin një provincë që pret një ribashkim dhe lufton për ta bllokuar atë nga të gjitha institucionet ndërkombëtare. Nacionalistët e mposhtur të Kinës u larguan në Tajvan më 1949, por ishulli ka evoluar në një demokraci vetë-qeverisëse.
Tajvani është bërë një model për reagimin e tij të shpejtë ndaj shpërthimit të koronavirusit, me vetëm gjashtë vdekje, pavarësisht afërsisë dhe lidhjeve ekonomike me Kinën, dhe ka dhuruar maska dhe furnizime të tjera në të gjithë botën.
Departamenti i Shtetit Amerikan nuk iu përgjigj pyetjeve nëse Shtetet e Bashkuara do të merrnin pjesë në Asamblenë Botërore të Shëndetit, e cila përcakton politikën globale të shëndetit dhe në përgjithësi ndiqet nga ministrat e shëndetësisë ose zyrtarë të tjerë të lartë.
Deri në momentin e deklaratës së Trump, SHBA ishte kontribuesi kryesor në OBSH, duke dhënë më shumë se 400 milion dollarë në vit për të ndihmuar përpjekjet globale për të luftuar sëmundjet e shumta, përfshirë malarien dhe poliomielitin. / The Guardian – bota.al
