Një shtëpiake britanike, dëshmon se kur ishte rreth 5-vjeç, kaloi 5 vite e ardhshme duke jetuar si pjesë e një grupi majmunësh Kapuçonë në një xhungël kolumbiane
“The Week”
Për të marrë me të mirë dy vajzat e saj të vogla dhe vënë në gjumë, shtëpiakja britanike Marina Çapman do t’i rrëfente histori mbi rritjen e njerëzve në xhungël. Por ato nuk ishin përralla, por ngjarje të bazuara në jetën e saj reale. Në moshën 5-vjeçare, Çapman, që asokohe jetonte në Kolumbi me prindërit, thuhet se u rrëmbye dhe u braktis qëllimisht në xhungël për të vdekur.
Ajo arriti t’i bashkohet një fisi majmunësh Kapuçonë, “duke ngrënë dhe pirë si ata, kopjuar aktivitetet dhe gjuhën e tyre”, derisa u bë pjesë e familjes në të cilën ajo qëndroi gjatë 5 viteve të ardhshme.
Rrëfimet e jashtëzakonshme të Çapman janë përbledhur në librin e saj “Vajza e pamemër: Historia e pabesueshme por e vërtetë e vajzës së rritur nga majmunët”. Por e saja nuk është përralla e parë e pabesueshme e një fëmije të rritur në mjedisin e egër të natyrës. Në këtë libër, Marina tregon edhe historitë e 5 fëmijëve të tjerë të rritur nga kafshët:
1. Rritur nga majmunët
Kur ishte rreth 5-vjeç, Marina Çapman thotë se u rrëmbye, ndoshta për të marrë ndonjë shpërblim, por më pas u braktis në xhunglën kolumbiane. Për afro 5 vitet e ardhshme, ajo jetoi jashtë në botën e egër, ku u mor nga një grup majmunësh Kapçionë, për të cilët ekspertët thonë se janë të njohur për pranimin e fëmijëve të vegjël në kullotat e tyre.
Kafshët i mësuan Marinës se si të kapte zogj dhe lepuj me duart e saj të zhveshura, kështu që ajo qe në gjendje të mbijetonte. Çapman i bashkua botës njerëzore kur u mor nga gjuetarët për t’u shitur në një shtëpi publike, nga e cila u arratis pas disa kohësh.
2. Rritur nga dhitë
Në qershor të vitit 2012, punonjësit socialë në Rusi gjetën një fëmijë të vogël, që ishte mbyllur në dhomë me disa dhi nga ana e nënës së tij. Thuhet se djali luajti dhe e zuri gjumi me dhitë, por ushqimi ishte me sa duket i vështirë për t’u siguruar dhe ai peshonte një të tretën më pak se një fëmijë tipik i moshës së tij.
Kur fëmija u shpëtua, nëna e tij qe zhdukur. Mjekët u përpoqën ta përshtasin jetën e foshnjës me atë të njeriut normal, por me disa vështirësi. “Ai nuk pranonte të flinte në shtrat. U përpoq të ulej përtokë dhe të flinte atje. Ai ishte shumë i frikësuar nga të rriturit”- thotë një mjek.
3. Rritur nga macet dhe qentë e egër
Në vitin 2009, punëtorët e mirëqënies sociale, qenë duke shkuar në një banesë pa ngrohje në një qytet të Siberisë, kur gjetën një vajzë 5-vjeçare që ata e quajtën “Natasha”. Ndërsa teknikisht jetonte me babain e saj dhe të afërmit e tjerë, Natasha ishte trajtuar si një nga shumë qentë dhe macet e egra që ndanin hapësirën e përbashkët. Ashtu si shoqet e saj të mbuluara me qime, Natasha hante ushqimin nga tasi i lënë në dysheme. Ajo nuk di asnjë fjalë njerëzore dhe komunikon vetëm me lehje dhe mjaullima. Babai nuk gjendej askund kur autoritetet e shpëtuan vajzën, dhe Natasha u dërgua në një jetimore.
4. Rritur nga macet e egra
Policia argjentinase zbuloi një djalë 1-vjeçar të braktisur nga prindërit dhe të rrethuar nga 8 mace të egra në vitin 2008. Thuhet se macet e mbajtën djalin gjallë gjatë netëve të acarta të dimrit, duke u ulur në krye të tij dhe madje u përpjekur t’i lëpinin baltën që mbulonte lëkurën e tij. Djali u pa gjithashtu ngrënë mbeturina ushqimi, me gjasë të përgatitur nga kafshët e tij mbrojtëse.
5. Rritur nga qentë e egër
Një djalë 10-vjeçar kilian u gjet në vitin 2001, pasi kishte jetuar në një shpellë me një tufë qensh për të paktën dy vjet. Djali i kishte mbijetuar tashmë një fëmijërie të ashëpr dhe të paqëndrueshme, duke qenë i braktisur nga prindërit e tij dhe pastaj i larguar nga jetimorja. I vetëm, fëmija kërkoi strehim tek një tufë qensh, të cilët e ndihmuan të sigurojë ushqim, madje edhe e mbrojtën atë. Zyrtarët thanë se djali mund të ketë pirë qumësht nga njëra prej qenve femra. “Ata ishin si familja e tij”- tha një zëdhënës.
6. Rritur nga ujqit
Një nga rastet më të mirë-dokumentuara të rritjes nga kafshët e egra, është ai i Kamalës dhe Amalës, të njohur ndryshe si “fëmijët e ujkut”. Të zbuluara në vitin 1920 në xhunglat e Godamurit në Indi, vajzat të moshës 3 dhe 8-vjeçc, kishin jetuar me një ujkonjë dhe tufën e saj. Nuk dihet nëse vajzat ishin nga e njëjta familje, por personi që gjeti vajzat, Reverend J.A.L. Sing, i mori në jetimoren e tij, ku u përpoq t’i mësojë të përshtateshin me jetën njerëzore. Ndërsa vajzat bënë progres me kalimin e viteve, të dyja në fund u sëmurën nga sëmunjdje vdekjeprurëse, duke bërë që Reverendi të pyesë veten: “nëse gjëja më e drejtë për të bërë do të ishte lënia e tyre në botën e egër, aty ku i gjeta”.
Në shqip nga bota.al
