Nga Paul Thagard
Sipas chopra.com dhe faqeve të tjera të internetit, Universi na dërgon shpesh mesazhe që ne përpiqemi t’i kuptojmë. Kur njerëzit janë në mëdyshje se si ta vazhdojnë jetën e tyre, ata vërejnë ndonjëherë se Universi po përpiqet që t’u tregojë diçka.
Kjo mëdyshje mund të nxitet nga ngjarje befasuese në jetën e përditshme, si ëndrrat, takimet e rastësishme dhe dukuri të tjera. Por ekzistojnë 2 arsye të forta për të hedhur poshtë pretendimin se Universi po komunikon me njerëzit.
Së pari, Universit i mungon aftësia për t’ju thënë ndonjë gjë. Universi është gjithçka që ekziston, tërësia e të gjithë materies dhe energjisë, përfshirë të gjithë yjet dhe planetët. Ai përfshin individë të veçantë që mund t’ju dërgojnë mesazhe, përkatësisht njerëzit që janë në gjendje të gjenerojnë fjali apo imazhe që mund t’ju transmetohen përmes të folurit, shkrimit dhe mjeteve të tjera të komunikimit.
Por planetë të veçantë, yje, galaktika, apo të gjitha së bashku, nuk kanë inteligjencën për të komunikuar. Kafshët në planetin tonë janë agjentët e vetëm të njohur në Univers që komunikojnë. Megjithatë, një ditë ne mund të kemi arsye për të besuar se qeniet e tjera inteligjente mund të komunikojnë me ne.
Komunikimi kërkon fuqi të mjaftueshme nervore për të formuar mesazhe dhe synime për t’ua transmetuar ato të tjerëve. Në tërësi Universi është i paaftë në aspektin njohës për të gjeneruar dhe dërguar ndonjë mesazh, e lëre më pastaj ato që ne mund të jemi në gjendje t’i kuptojmë.
Së dyti, dukuritë e ndryshme që i nxitin njerëzit të dyshojnë se Universi po përpiqet t’u tregojë atyre diçka, të gjitha mund të shpjegohen shumë më thjesht me mjete më të arsyeshme. Një faqe interneti liston 21 shenja që tregojnë se Universi po përpiqet t’ju tregojë diçka.
Megjithatë, shumica e tyre shpjegohen lehtësisht nga proceset e njohura shkakësore: humbja ose gjetja e gjërave, thyerja ose mosfunksionimi i objekteve, emocionet e papritura të pashpjegueshme, dhimbjet e përsëritura, ndjenjat e zorrëve, erërat, moti, të dridhurat e papritura, vonesat e papritura, problemet shëndetësore dhe keqfunksionimet teknologjike. Këto kanë shpjegime të dhëna nga fizika, biologjia, mjekësia, psikologjia dhe shkencat e tjera.
Shenjat e tjera të supozuara shpjegohen më së miri si aksidente, të cilat janë kryqëzime të proceseve shkakësore të palidhura më parë: takime sinkronike, manifestime të shpejta dhe të furishme, numra ose modele të përsëritura, kafshë të përsëritura, përvoja të përsëritura ose déjà vu, tekste këngësh të caktuara, fjalë dhe fraza të përsëritura, fjalët të pazakonta, zgjidhjet ose dhurata të papritura.
Për shembull, nëse dy makina përplasen në një rrugë të ngarkuar me trafik, i vetmi shpjegim i nevojshëm është se shtigjet e tyre të pavarura më parë kishin një konvergjencë të habitshme.
A janë ëndrrat komunikime të mundshme nga Universi? Unë kam argumentuar më herët se edhe ëndrrat e çuditshme dhe befasuese nuk kanë ndonjë rëndësi të veçantë.
Ëndrrat janë efekte anësore të aktivitetit nervor gjatë gjumit, që është një gjendje e pazakontë pasi trupat nuk kanë stimulim ndijor. Truri duhet ta kuptojë aktivitetin nervor të shkaktuar nga konsolidimi i kujtesës duke u përpjekur të dalë me një interpretim koherent.
Truri ynë është shumë aktiv gjatë gjumit, me lëvizje të rastësishme të syve, kur truri përpunon ndodhitë e ditës në mënyrë që të kuptojë se çfarë ia vlen të zhvendoset në kujtesën e përhershme. Ëndrrat që shohim mund të na tregojnë diçka për shqetësimet tona, si familja, puna dhe udhëtimi. Por detajet e veçanta nuk kanë asnjë rëndësi.
Ngjashëm, rastësitë ndodhin sepse ato janë thjesht aksidente të kryqëzimit të zinxhirëve shkakësorë, dhe jo sepse gjithçka ndodh për një arsye. Kjo thënie është një shembull i arsyetimit të motivuar sepse ne duam të supozojmë se jeta jonë ka kuptim në një farë mënyre përfundimtare.
Por është më mirë të pranojmë se aksidentet dhe rastësitë thjesht ndodhin. Njerëzit kanë shpesh nevojë për këshilla se si të vazhdojnë jetën e tyre. Por për këtë duhet të dëgjojnë miqtë e tyre, pjesëtarët e familjes ose psikoterapistët. Mos prisni të dëgjoni ndonjë gjë nga Universi.
Shënim: Profesor Paul Thagard, filozof dhe shkencëtar i aftësive njohëse nga Kanadaja. Libri i tij i fundit titullohet “Ekuilibri:Si funksionon çfarë do të thotë”. / “Psychology Today” – Bota.al
