Kancelarja gjermane Angela Merkel tha të mërkurën se Bashkimi Evropian duhet të marrë më shumë përgjegjësi globale në krizën e koronavirusit, veçanërisht pasi lidhjet me Shtetet e Bashkuara janë aktualisht “të vështira”.
Në një fjalim që përshkruan përparësitë e Gjermanisë kur të marrë përsipër presidencën e rradhës të BE-së në korrik, Merkel tha se trazirat ekonomike dhe sociale nga pandemia e kanë kthyer botën përmbys. Ajo përshëndeti fondin prej 750 miliardë eurosh, të propozuar nga Komisioni Evropian për rigjenerimin e ekonomisë pas koronavirusit por tha se duhet të bëhet më shumë për të ndihmuar vendet e tjera.
“Sidomos në kohë krize, unë dua që Bashkimi Evropian të tregojë solidaritet edhe në një nivel global dhe të marrë më shumë përgjegjësi,” i tha ajo Qendrës së Mendimeve Konrad Adenauer Stiftung. “Në shumë vende, pandemia do të intensifikojë konfliktet dhe problemet ekzistuese dhe për këtë arsye do të bëhet gjithashtu një provë stresi për Bashkimin Evropian.” Ajo i bëri thirrje bllokut të flasë për vlerat e “demokracisë, lirisë dhe mbrojtjes së dinjitetit njerëzor”. Sidoqoftë, Evropa nuk mund të trajtojë problemet e botës dhe ajo tha që Shtetet e Bashkuara mbetën “partneri më i rëndësishëm” i Evropës.
“Sigurisht që jam e vetëdijshëme se bashkëpunimi me Amerikën aktualisht është më i vështirë sesa do të donim,” tha Merkel, duke treguar dallimet me administratën e Presidentit Donald Trump në tregtinë, ndryshimin e klimës dhe rëndësinë e organeve ndërkombëtare si Organizata Botërore e Shëndetësisë . Sidoqoftë, ajo tha se marrëdhënia transatlantike ishte një “shtyllë kryesore” e politikës së jashtme të Evropës dhe interesave të sigurisë që duheshin mbështetur dhe forcuar.
Gjermania kishte planifikuar fillimisht të rregullonte marrëdhëniet me Kinën sapo të merrte presidencën e Këshillit të BE-së para se pandemia ta ndryshonte axhendën e saj. Bashkimi Evropian ka “një interes të madh strategjik” për të punuar me Kinën dhe “formuar në mënyrë aktive” marrëdhënien, tha Merkel. Kancelarja tha që ajo do të nxiste përparim e një marrëveshje të shumëpritur investimesh me Pekinin, që synon të nivelizojë fushën e lojës midis firmave kineze dhe evropiane, si dhe të trajtojë çështjet e klimës dhe shëndetit. France 24 / bota.al
