Është e besueshme, edhe pse dje Donald Trumpi nuk e përmendi gjatë konferencës së gjatë për shtyp nga Mar-a-Lago, që paralelisht shërbimet sekrete amerikane të kenë kërkuar një mbështetje brenda aparatit ushtarak vendas. Sado efikas të ketë qenë blitz-i amerikan, është e pashmangshme të imagjinohet se dikush i ka lehtësuar gjërat, në një vend prej vitesh të mbytur nga kontrolle që shkojnë deri në paranojë.
Muajt e fundit, në një linjë paralele, sekretari i Shtetit Marco Rubio po negocionte fshehurazi me Maduron dhe po testonte figurat më të spikatura të regjimit. Vetë Rubio, dje, konfirmoi se i kishte ofruar “disa herë” një “rrugëdalje” autokratit të Karakasit. Cila ishte? Askush nuk e ka shpjeguar.
A ishte administrata Trump e gatshme t’i ofronte diktatorit latino-amerikan një rrugëdalje, duke ia kursyer gjyqin në Shtetet e Bashkuara? Kjo është një nga zonat e errëta të kësaj ngjarjeje.
Në çdo rast, Uashingtoni ka vepruar në dy nivele: nga njëra anë me një rrjet spiunazhi të endur nga CIA dhe FBI; nga ana tjetër me një qasje politike.
Me dështimin e negociatave, ekipi politik i përbërë nga Rubio, sekretari i Luftës Pete Hegseth dhe këshilltari për Sigurinë e Brendshme Stephen Miller, planifikoi ndërhyrjen, natyrisht në bashkëpunim me gjeneralët e koordinuar nga shefi i Shtabit të Përgjithshëm të Forcave të Armatosura, Dan Caine.
Trump e kishte miratuar planin katër ditë më parë, menjëherë pas Krishtlindjeve, por kushtet e këqija të motit kishin këshilluar të pritej momenti i përshtatshëm. Ora X vjen kur në Uashington është 22:46 e së premtes, 2 janar.
Mobilizimi përfshin repartet e marinsave, aviacionin dhe mbi të gjitha skuadrat speciale antiterrorizëm Delta Force. Ngrihen në fluturim mbi 150 avionë nga 20 baza, të shpërndara në tokë, jo vetëm në Shtetet e Bashkuara, ose mbi aeroplanmbajtëse.
Vendosja është mbresëlënëse, një lloj katalogu i fuqisë amerikane: nga F-35 te bombarduesit B-1, përveç dronëve dhe helikopterëve. Për Trump-in është “operacioni më i madh që nga koha e Luftës së Dytë Botërore”.
Informacionet satelitore dhe njësitë e inteligjencës të fshehura në Karakas drejtojnë afrimin e formacionit ajror. Është mesnatë e thellë kur avionët bombardojnë të paktën katër objektiva në kryeqytet dhe rreth tij: portin La Guaira, aeroportin Higuerote, pozicionet e La Carlota-s dhe, më në fund, objektivin e vërtetë, kompleksin ushtarak super të ruajtur të Fuerte Tiunas, ku Maduro fle me bashkëshorten e tij, Cilia Flores.
Për amerikanët është thelbësore të ruhet faktori i surprizës: një gabim i vetëm do të rrezikonte dështimin. Gjenerali Caine shpjegoi dje se ishin studiuar të gjitha detajet për të “minimizuar” dëmet ndaj civilëve.
Trump i përjashtoi humbjet nga ana amerikane: “Nuk kemi humbur asnjë ushtar dhe asnjë mjet”. Dronët dhe bombarduesit nxjerrin jashtë funksionit bateritë kundërajrore, duke “hapur rrugën”, siç tha Caine, për helikopterët Apache me njësitë e Delta Force në bord.
Në orën 02:01, sipas orës së Karakasit (01:01 në Uashington dhe 07:01 në Itali), komandot hyjnë në perimetrin e kompleksit të Fuerte Tiuna-s. Shkëpusin energjinë elektrike, kapërcejnë barrierat mbrojtëse dhe depërtojnë brenda. Trump, përballë kamerave, komentoi se përplasjet kanë qenë të dhunshme.
Çifti presidencial pushon në katin përdhes. Brenda 46 sekondash, sipas versionit të Trump-it, “Delta”-t hyjnë me forcë në dhomën e gjumit. Maduro ka vetëm kohë të ngrihet dhe të tentojë të strehohet në një ambient ngjitur, një lloj bunkeri me derë çeliku.
Por pas pak hapash, ai kthehet drejt bashkëshortes së palëvizur në shtrat. Bllokohet. Dhe vihet menjëherë në pranga. Janë agjentët e FBI-së ata që i komunikojnë mandatin e arrestit të lëshuar nga prokurorët e Nju Jorkut, sepse siç vërejti Rubio, ky nuk është “një akt lufte”, por “zbatimi i një urdhri të dhënë nga gjyqtarët amerikanë”.
Misioni është pothuajse i përfunduar, por mungon faza ndoshta më delikate: nxjerrja e shpejtë e dy të burgosurve, ngarkimi i tyre në helikopterë dhe dalja nga hapësira ajrore e Venezuelës.
Në brigjet përballë është në pritje një njësi e marinës ushtarake amerikane, e udhëhequr nga aeroplanmbajtësja Iwo Jima. Në orën 04:29 sipas orës lokale, Apache-t ulen në kuvertën e anijes së madhe.
Avionët e eskortës kthehen në baza, flota merr drejtimin për nga brigjet e Shteteve të Bashkuara. Trump poston fotografinë e “Maduro-s në zinxhirë”, një Vercingetorix modern, por me kostum gri dhe fytyrën gjysmë të mbuluar nga syze të mëdha dielli. / bota.al
