Nunc est Bibendum

Gjendet vera më e vjetër në botë. Eshtë siçiliane, ka 6000 vite dhe ndryshon rrënjësisht historinë

Eshtë gjendur vera më e vjetër në botë. Ajo është italiane dhe ka 6000 vite mbi shpinë. Analizat kimike janë kryer në enë që i përkasin një epoke 4 mijë vite para Krishtit.

Zbulimi i mëhershëm i përkiste vitit 2013 dhe ishte pak më e re: 3700 vjeç. Ishte zbuluar mes rrënojave të Tel Kabrit, një qytet në veri të Izraelit.

Parësia e verës më të vjetër në Itali i përkiste në fakt asaj të prodhuar në Sardenjë afro 3 mijë vite më parë. Një shtrydhëse rrushi e gjetur në vitin 1993 në Malin Zara, pranë Monastirit në provincën e Kaljarit, mbante mbetje vere.

Librat e historisë që merren me verërat thonë se vitikultura dhe prodhimi i verës kanë lindur në Epokën e Bronzit dhe ky zbulim mund të ndryshojë njohuritë mbi ekonominë e shoqërive të lashta.

Analizat janë kryer nga Davide Tanasi i Universitetit të Floridës jugore, me bashkëpunimin e Këshillit Kombëtar të Kërkimeve të Universitetit të Katanias dhe ekspertë të fushës, në enë terrakote që janë gjetur në malin Kronio, 60 km larg nga Agrigento. Mbetjet kishin acid tartarik dhe kripëra natriumi, përbërës tipikë të verës. Pikërisht ato që kërkuesit shpresojnë të gjejnë kur janë në kërkim të verërave prehistorike.

Megjithatë, origjina e enologjisë mund të jetë edhe më e lashtë dhe jo italiane. Mund të ketë lindur në Iran – ku në malet Zagros janë gjetur tregues që i përkasin 7 mijë viteve më parë – ku verërat më të para mund të jenë prodhuar diku rreth viteve 7 apo 8 mijë para Krishtit.

Pija më e vjetër e fermentuar dhe alkoolike, është një verë e kuqe orizi dhe mjalti që është prodhuar në Jiahu, Kinë, 9 mijë vite më parë.

Ne njerëzit megjithatë kemi mbërritur vonë: para nesh, kafshët, të parët fare elefantët, ushqeheshin me fruta të fermentuara për të mundur të përthithin alkool dehës. / Bota.al

Leave a Reply

Back to top button