Miliarderët Michael dhe Susan Dell premtuan një donacion prej 6.25 miliardë dollarësh për t’u ofruar 25 milionë fëmijëve amerikanë nën 10 vjeç një stimul financiar për të përfituar nga llogaritë e reja të investimeve për fëmijë, të krijuara si pjesë e paketës fiskale dhe buxhetore të Donald Trumpit.
Ky donacion historik është pothuajse i pashembullt: në 25 vitet e fundit shumë pak angazhime filantropike individuale kanë kaluar shifrën 1 miliard dollarë, e aq më pak disa miliarda. I shpallur në Ditën e Dhurimit (GivingTuesday), familja Dell beson se ky është angazhimi më i madh privat i bërë ndonjëherë për fëmijët në SHBA.
Dhurimi është i pazakontë edhe për mënyrën se si do të funksionojë: paratë do të kalojnë përmes llogarive të investimit të krijuara nga Departamenti amerikan i Thesarit, por të menaxhuara nga kompani private. Programi, i quajtur “llogaritë Trump”, ende nuk është vënë në zbatim, por u miratua më 4 korrik si pjesë e ligjit kryesor të presidentit. Administrata kishte njoftuar më herët se planifikon të kontribuojë me 1,000 dollarë në këto llogari për çdo fëmijë të lindur mes viteve 2025 dhe 2028.
Fondet në llogaritë Trump duhet të investohen në një fond indeksi, i cili ndjek ecurinë e tregut të aksioneve.
“Llogaritë Trump do të jenë, mund të thuhet, fondet e para të mirëfillta të besimit për çdo fëmijë amerikan, duke u lejuar familjarëve, punëdhënësve, korporatave dhe donatorëve bujarë të kontribuojnë para që do të investohen dhe do të rriten”, tha Trump në një konferencë për shtyp në Shtëpinë e Bardhë, disa orë pas shpalljes së donacionit të familjes Dell.
Ai shtoi: “Do të bëhet një investim, dhe ai investim do të vazhdojë të rritet, shpresojmë, apo jo? Ne shpresojmë. Dhe do të rritet.”
Trump sugjeroi se edhe ai vetë do të kontribuonte në llogaritë Trump. Gjatë konferencës, Michael Dell tha se kishte biseduar edhe me “amerikanë të pasur” të tjerë për të dhënë kontribut.
“Dhurimi ynë do të mbulojë shumicën e fëmijëve 10 vjeç e më poshtë që nuk janë pjesë e programit federal, pra fëmijët nga mosha zero deri në dy vjeç,” tha Michael Dell, themelues dhe CEO i Dell Technologies, me pasuri të vlerësuara prej 148 miliardë dollarësh, sipas Forbes.
Me donacionin e tyre, familja Dell do të depozitojë 250 dollarë në llogarinë e investimit për çdo fëmijë që kualifikohet. Ata thanë se Thesari planifikon t’i lançojë këto llogari më 4 korrik 2026. Dell shtoi se kjo datë është zgjedhur për të shënuar 250-vjetorin e pavarësisë së SHBA.
Megjithatë, do të jetë detyrë e familjeve të fëmijëve të tjerë që të shtojnë fonde në këto llogari. Kur fëmijët të mbushin 18 vjeç, ata mund t’i tërheqin fondet për të financuar arsimimin, blerjen e një shtëpie, ose nisjen e një biznesi. Familja Dell shpreson që dhurimi i tyre do të nxisë familjet të hapin llogaritë dhe të kontribuojnë më tej, qoftë edhe me shuma të vogla, në mënyrë që investimi të rritet me kohën bashkë me tregun e aksioneve.
Në vitin 2024, rreth 13% e fëmijëve dhe të rinjve në SHBA jetonin në varfëri, sipas Fondacionit Annie E. Casey, dhe ekspertët e lidhin nivelin e lartë të varfërisë tek fëmijët me mungesën e mbështetjes sociale për prindërit e rinj, si p.sh. leja e paguar prindërore.
Familja Dell do të depozitojë para në llogaritë e fëmijëve që jetojnë në zona postare ku të ardhurat mesatare familjare janë 150,000 dollarë ose më pak.
Megjithëse fondet në llogaritë Trump mund të ndihmojnë të rinjtë të cilët marrin kontribute të vazhdueshme nga familjet apo punëdhënësit e tyre, ato nuk do të kenë ndikim të menjëhershëm në uljen e varfërisë së fëmijëve. Shkurtimet në Medicaid, kuponët ushqimorë dhe kujdesin për fëmijët, të përfshira gjithashtu në paketën buxhetore, pritet të ulin mbështetjen për familjet me të ardhura të ulëta.
“Do të sigurohemi që çdo familje amerikane të ketë një pjesë në suksesin e Shteteve të Bashkuara të Amerikës,” tha Scott Bessent, sekretari i Thesarit, në konferencën e së martës. “Njerëzit që kanë një pjesë në sistem dhe investohen gjithnjë e më shumë në të, nuk duan ta rrëzojnë sistemin. Ata duan ta përmirësojnë atë.” Ai shtoi se llogaritë Trump kanë hapur “një epokë të re kapitalizmi dhe interesi tregtar”. / bota.al
