Mesazhi anonim i dërguar civilëve në revoltë. Presidenti amerikan ka përgatitur një sulm “me faza”. SMS për sulm ndaj Iranit shkakton alarm jo vetëm në Lindjen e Mesme
“Presidenti i Shteteve të Bashkuara është njeri i veprimit, prisni dhe do ta shihni.” Përmbajtja e një vale mesazhesh telefonike, të dërguara orët e fundit disa qytetarëve iranianë, duket se konfirmon se një sulm amerikan ndaj Iranit mund të jetë çështje orësh, maksimumi ditësh. Dërguesi i mesazheve është anonim, por teksti është i qartë dhe është shpërndarë ndërsa aeroplanmbajtësja amerikane Ford, më e madhja në botë, po lëviz nga Kreta drejt brigjeve izraelite.
Avionë të rinj amerikanë për furnizim dhe transport kanë zbritur dje në Tel Aviv, duke e çuar respektivisht në 85 dhe 170 numrin e mjeteve ajrore të dërguara në Lindjen e Mesme. India u ka kërkuar qytetarëve të saj të largohen nga Irani, ndërsa dhjetëra anëtarë të stafit të ambasadës amerikane në Bejrut janë evakuuar, shenjë se po përgatitet edhe për një përshkallëzim më të gjerë.
Gjithçka duket gati për një veprim ushtarak të Shteteve të Bashkuara kundër Iranit, pavarësisht se sot Teherani, përmes sekretarit të Këshillit Suprem të Sigurisë Kombëtare, Ali Larijani, paraqet një propozim për vetë-kufizim të programit bërthamor iranian tek autoritetet e Omanit, që ndërmjetësojnë në negociatat indirekte me SHBA-në, në përpjekje për të shmangur një konflikt të hapur me Uashingtonin.
Sulm ndaj Iranit, por bisedimet vazhdojnë
Të enjten pritet të zhvillohet në Gjenevë raundi i tretë i bisedimeve SHBA-Iran, por sinjalet dhe zërat tregojnë se përplasja është një hap larg, në mungesë të zhvillimeve konkrete. Megjithatë, sipas një burimi për faqen Axios, zëvendëspresidenti amerikan JD Vance duket se shpreson ende tek diplomacia, i shqetësuar për rrezikun e një përfshirjeje të zgjatur të SHBA-së, shqetësim që do ta kishte theksuar edhe shefi i Shtabit të Përgjithshëm, Dan Caine.
Ora e së vërtetës po afrohet, ndërsa zemërimi i iranianëve rritet dhe revolta e të rinjve në universitete hyn sot në ditën e katërt. Reza Pahlavi, djali i ish-Shahut, u ka bërë thirrje forcave të armatosura të ndahen nga regjimi.
Sekretari amerikan i Shtetit, Marco Rubio, ka shtyrë për javën e ardhshme vizitën e tij në Izrael, ndërsa Irani ka paralajmëruar për “rrezikun e një përshkallëzimi” përtej kufijve kombëtarë. Benjamin Netanyahu ka paralajmëruar se, nëse Teherani do të shënjestronte Tokën e Shenjtë, do të bënte “gabimin më të madh të historisë së tij”, duke bërë thirrje për unitet, thirrje që u mbështet edhe nga lideri i opozitës, Yair Lapid, i cili i kërkoi kryeministrit izraelit të sulmojë “me gjithë forcën”.
Dyshimet tashmë lidhen më shumë me mënyrën e sulmit amerikan sesa me mundësinë që ai të ndodhë realisht. Për t’i bindur ajatollahët të tërhiqen nga programi bërthamor, Donald Trump mund të nisë me goditje ndaj infrastrukturave strategjike. Nëse kërcënimi nuk do të kishte efekt, presidenti amerikan do të fillonte një fushatë më të gjerë ushtarake për rrëzimin e diktaturës.
Silm ndaj Iranit, por me faza
Sipas gazetës Maariv, që raporton mbi mbledhjen e Kabinetit të Sigurisë izraelite të dielën, Shtetet e Bashkuara po synojnë një marrëveshje me faza, sipas modelit të përdorur për Rripin e Gazës: fillimisht çështja më urgjente, ajo bërthamore, më pas raketat, milicitë aleate dhe represioni.
Për ta arritur këtë, Trump mban “pistoletën mbi tavolinë”, i vetëdijshëm se nëse këmbëza do të shtypej, përgjigjja e Teheranit mund të çonte në një konflikt rajonal.
Udhëheqësi Suprem iranian, Ali Khamenei, tani duket se po dridhet vërtet. Sipas Le Figaro, udhëheqja e tij është lëkundur që nga fillimi i janarit, kulmi i protestave, kur ish-presidenti Hassan Rouhani thuhet se kishte tentuar një grusht shteti për ta larguar nga pushteti. / bota.al
