Është zyrtare. Evropa po kalbet dhe drejtohet nga një klikë udhëheqësish të dobët, sipas një sulmi të ashpër të Donald Trumpit.
Arsyeja për këtë është e thjeshtë: politika katastrofike e Europës për imigracionin do të thotë se “njerëzit që po hyjnë kanë një ideologji krejtësisht të ndryshme”, gjë që po e dobëson fatalisht kontinentin.
Shpërthimi i tij vjen pas adoptimit të një qëndrimi të ri të politikës ndërkombëtare të SHBA-së, i cili argumenton se Evropa përballet me një “zhbërje civilizuese” dhe tashmë është duke ushtruar “censurë të lirisë së fjalës dhe shtypje të opozitës”. Këto nuk janë postimet më të fundit në rrjetet sociale nga ndonjë i çmendur në Shtëpinë e Bardhë. Ky është vlerësimi i mendjeve më të mira të administratës, që sapo kanë hartuar Strategjinë e Sigurisë Kombëtare 2025.
Ky është versioni i shkruar i mënyrës se si të gjithë në Shtëpinë e Bardhë duhet ta shohin botën, dhe mjeti përmes të cilit synojnë të na bindin edhe ne ta shohim planetin po kështu.
“Me kalimin e kohës, është mëse e mundshme që brenda disa dekadave, disa anëtarë të NATO-s të bëhen shumicë jo–europiane,” thuhet në dokument.
Kjo është marrëzi. Nuk ekziston asnjë analizë serioze demografike që tregon se ndonjë komb europian do të bëhet ndonjëherë shumicë “jo–europiane”.
Administrata Trump po i merr udhëzimet e saj demografike për Evropën nga e ashtuquajtura Teoria e Zëvendësimit të Madh, një term i shpikur nga teoricieni francez i konspiracioneve Renaud Camus, i cili pretendon se një “elitë globale” po bashkëpunon kundër popullsisë së bardhë të Evropës për t’i zëvendësuar ata me popuj jo–europianë.
Kjo teori ka një ndjekje të fuqishme mes grupeve të ekstremit të djathtë, fanatikëve të QAnon dhe mbështetësve të MAGA-s. Dhe tani ky është vizioni zyrtar afatgjatë i vetë Amerikës. Një vizion mbi të cilin do vendosen marrëdhëniet e SHBA-së me Perëndimin dhe botën anglosaksone nga tani e tutje. Aq e shqetësuar është Amerika, saqë synon të ndërhyjë dhe të detyrojë një ndryshim drejtimi në Evropë, duke mbështetur grupet që përputhen ngushtë me politikat amerikane dhe duke minuar ato që nuk përputhen.
“Ne do të kundërshtojmë kufizimet elitare, antidemokratike ndaj lirive thelbësore në Evropë, në botën anglosaksone dhe në pjesën tjetër të botës demokratike, veçanërisht mes aleatëve tanë,” thuhet në dokument.
Administrata Trump po lufton kundër Aktit të Shërbimeve Dixhitale të Evropës (Digital Services Act), i cili kërkon që kompanitë e internetit, kryesisht ato me bazë në SHBA si Meta, Apple dhe Google, të moderojnë përmbajtjen, të heqin materialin e paligjshëm ose të dëmshëm dhe të frenojnë dezinformimin.
Shtëpia e Bardhë ka bërë akuza për “censurë” kundër vendeve europiane, për përpjekjet e tyre për të rregulluar kompani që gjenerojnë fitime gjigante, por që shqetësohen se rregullat e reja do të jenë të kushtueshme për t’u zbatuar.
Zëvendëspresidenti JD Vance ka shumë gjasa të ketë luajtur rolin kryesor në hartimin e doktrinës së re të Shtëpisë së Bardhë. Përmbajtja e saj pasqyron nga afër sulmet e tij befasuese ndaj NATO-s dhe demokracisë europiane gjatë vizitës së tij të parë zyrtare në kontinent në shkurt. Edhe atëherë, ai shprehu hapur mbështetjen për grupet dhe partitë e ekstremit të djathtë.
“Amerika inkurajon aleatët e saj politikë në Evropë të promovojnë këtë ringjallje të shpirtit, dhe rritja e ndikimit të partive patriotike evropiane është me të vërtetë arsye për optimizëm,” thuhet në dokumentin e ri.
Ndikimi tjetër i dukshëm në këtë dokument është Vladimir Putini.
Regjimi i tij është bërë një pikë reference për shumë figura të ekstremit të djathtë dhe për evangjelistët e krishterë që mbështesin Trump. Pretendimet e hapura të Putinit se ai përfaqëson vlerat tradicionale të krishtera të bardha janë magnet për adhuruesit e teorisë konspirative të Zëvendësimit të Madh.
Trumpi e ka mbështetur Rusinë në çdo hap që prej rikthimit në detyrë. Ai është pozicionuar kundër mbështetjes europiane për Kievin dhe kundër argumenteve që tregojnë se Ukraina mund të dëbojë forcat ruse, nëse merr ndihmën që i nevojitet.
Trumpi ka ndërprerë gjithë ndihmën përveç mbështetjes së inteligjencës për Ukrainën, ndërsa ka kërkuar 50 për qind të fitimeve për SHBA-në dhe kompanitë amerikane në çdo marrëveshje të ardhshme paqeje për Ukrainën.
Thelbësore për strategjinë afatgjatë të Putinit është minimi i aleancave diplomatike perëndimore dhe i kohezionit të tyre. Brexit ishte një hap i madh në atë drejtim, po ashtu edhe rizgjedhja e Trumpit.
Ashtu si Trumpi, edhe ai kërkon të zgjerojë dezinformimin dhe dyshimin brenda shoqërive civile perëndimore duke pretenduar se qeveritë, si administrata e Volodymyr Zelenskyt në Ukrainë, janë ilegjitime dhe jodemokratike.
Dokumenti i ri amerikan për politikën e jashtme pretendon se, sa i përket Ukrainës, “Një shumicë e madhe europiane kërkon paqe, por kjo dëshirë nuk përkthehet në politikë, në masë të madhe për shkak të nënshtrimit të proceseve demokratike nga ato qeveri.”
Ndërkohë, demokracia në Amerikë është zbrazur nga brenda, me sulme ndaj çdo dege të administratës federale, mediave, akademisë dhe ushtrisë. Besnikëria ndaj Zyrës Ovale tani ka përparësi ndaj çdo betimi për të mbrojtur kushtetutën, si një kusht pune për zyrtarët në mbarë SHBA-të. / The Independent – Bota.al
