Uashingtoni mund të bllokojë ndihmën për Ukrainën. Kjo është një hipotezë që po qarkullon në nivelet e larta të Shtëpisë së Bardhë pas përplasjes së ashpër në Zyrën Ovale midis Zelenskyt dhe Trumpit. Vendimi ende nuk është marrë, theksojnë burimet. Por vetë presidenti ukrainas ka pranuar, në një intervistë për Fox News, se pa ndihmë do të jetë e vështirë të mbijetojë edhe rezistenca ushtarake. Cila është situata aktuale?
1. Shifrat
Pentagoni ka ende në dispozicion 3.85 miliardë dollarë që mund të përdoren për të furnizuar Ukrainën me armë nga arsenali amerikan. Kjo është pjesë e trashëgimisë së mbetur nga administrata Biden, me këstin e fundit prej 60.8 milionë dollarësh të miratuar më 20 prill. Sipas burimeve të Pentagonit, Uashingtoni ka urdhëruar një tërheqje të përshpejtuar të armëve nga depot, në një total prej 34 miliardë dollarësh. Një tjetër burim i ndihmës ushtarake ka qenë një program special që i ka mundësuar Kievit të blejë armë drejtpërdrejt nga SHBA. Deri më tani, janë përdorur 33.2 miliardë dollarë për këtë qëllim, me një mesatare 44 milionë dollarë në ditë.
2. Efekti Trump
Ky ritëm është ndërprerë që nga ardhja e Trumpit. Një dërgesë e fundit e armëve, e miratuar 50 ditë më parë, është ende duke u përgatitur dhe pritet të mbërrijë në Ukrainë në javët e ardhshme. Megjithatë, administrata amerikane nuk ka dhënë asnjë garanci për dërgesat e ardhshme. Pakoja e fundit e ndihmës për Ukrainën, e miratuar nga Kongresi më 20 prill, mbetet burimi i fundit i sigurt i financimeve, pasi nuk ka asnjë garanci se administrata do të kërkojë më shumë fonde në të ardhmen.
3. Shkurtime nga Trumpi
Jo vetëm armët dhe municionet mund të reduktohen. Sipas disa burimeve, ndihmat e tjera indirekte janë gjithashtu në rrezik. Kjo përfshin shërbimet e inteligjencës, mbikëqyrjen ajrore, programet e trajnimit dhe qendrat e koordinimit të ndihmave në Gjermani.
4. Deri në dy muaj
Celeste Wallander, një zyrtare e Pentagonit që ka shërbyer nën administratën Biden, i ka thënë Wall Street Journal se rezervat dhe municionet e Ukrainës mund të zgjasin deri në fund të vitit. Por burime të tjera flasin vetëm për dy muaj. Burime nga Ministria e Mbrojtjes për La Stampa kanë përmbledhur situatën me një deklaratë të shkurtër: “Ukrainasit duhet të kursejnë dhe të shpenzojnë ndihmat në mënyrë më strategjike, pasi është e pamundur të arrijnë nivelin e fuqisë së zjarrit të Rusisë.”
5. Nëse Amerika largohet
Në këtë rast, Ukraina do të humbasë asetet dhe armët strategjike që vetëm SHBA mund t’i sigurojë. Vendet europiane, të cilat vitin e kaluar shpenzuan 25 miliardë dollarë, një shumë më e vogël se ajo e SHBA-ve, nuk do të jenë në gjendje të kompensojnë boshllëkun e krijuar nga mungesa e ndihmës amerikane. / bota.al
