Mohamed Lahouaiej Bouhlel, shoferi i kamionit që vrau të paktën 84 persona në Nicë të enjten, kishte planifikuar sulmin dhe ishte gjithë kohës i zënë me përgatitjet e tij, raportojnë mediat lokale duke cituar hetuesit.
Policia ka inspektuar telefonin e atentatorit, i gjetur në kamionin e tij. Ata zbuluan disa mesazhe me tekst që Bouhlel duket se i kishte shkruar bashkëpunëtorëve të tij, pak përpara tragjedisë. Në një mesazh thuhet: “I kam pajisjet”.
Bouhlel mund ta ketë patur fjalën për kamionin që kish marrë me qera, ose për armët, një granatë dhe një pistoletë 7.65 me të cilën ai qëlloi ndaj policisë gjatë sulmit, përpara se të vritej. France-TV raporton se Bouhlel kishte blerë armë nga dy shqiptarë, të cilët janë në mesin e 6 personave aktualisht në paraburgim në lidhje me rastin. Ish-gruaja Bouhlel, e arrestuar edhe ajo më herët, u lirua të dielën, sipas AFP.
Një tjetër mesazh, që atentatori e dërgoi në 22:27 sipas kohës lokale, pak para sulmit, kërkon që të “sillni më shumë armë, sillini në 5 tek C” raporton “Nice Matin”, duke cituar një burim të afërt me hetimin. Mediat thonë se policia ka qenë në gjendje që të gjejë personin të cilit i dërgoheshin mesazhet, por nuk ka zbuluar ndonjë hollësi të mëtejshme.
Hetuesit që punojnë me telefonin dhe pajisjet kompjuterike të Bouhlel, ende po përpiqen që të kuptojnë nëse ai ishte i lidhur me islamistët radikalë. “Disa emra ‘interesantë’ u shfaq në mesin e kontakteve të tij,” raporton Le Monde, duke cituar burime të afërta me hetimin.
Dy ditë tur nëpër Nicë
Hetuesit zbuluan gjithashtu të dielën se Bouhlel kishte bredhur rreth qytetit, me kamionin që kishte marrë me qera dy ditë para masakrës, me sa duket duke kërkuar për vendin më të efektshëm, për të kryer sulmin e tij. Radio Evropa 1 raporton se Bouhlel e ka vizituar Promenade des Anglais, ku ndodhi sulmi, dy herë më 12 dhe 13 korrik. Pretendohet se ai shfaqet në pamjet e kamerave të vëzhgimit, duke shqyrtuar me kujdes zonën nga dritarja e kamionit. AFP e konfirmon këtë informacion, duke cituar një burim gjyqësor.
Atentatori boshatisi llogarinë bankare, shiti makinën
Një burim i policisë i cituar nga gazeta franceze Journal du Dimanche, tha se Bouhlel kishte “zbrazur llogarinë e tij bankare” një javë para tragjedisë. Sipas të njëjtit burim, ai gjithashtu kishte shitur “makinën e tij të vjetër të mërkurën, 13 korrik, në prag të sulmit”. Në media dhe në rrjetet sociale qarkullojnë të dhëna se se Bouhlel kishte planifikuar që të dërgonte paratë që kish mbledhur tek të afërmit e tij në Tunizi, por këto pretendime janë mohuar zyrtarisht nga një burim i afërt me hetimin, sipas “Nic Matin”.
Automjeti
Të hënën, 11 korrik, tri ditë para kasaphanës, Bouhlel mori me qira një kamion në një agjenci të makinave me qira për shoferët profesionistë, tnë Saint-Laurent-du-Var, një qytet fqinj me Nicën, në afërsi të aeroportit Bukur-Côte d’Azur, sipas radio RTL. Ai vendosi të marrë me qira një kamion të bardhë frigorifer, i cili peshon 19 ton, i njëjti që përdori për të shkelur mbi 84 njerëz në Nisë. Agjencia bën të ditur se ai erdhi personalisht dhe paraqiti kartën e identitetit të tij, si dhe licencën për të ngarë automjete me peshë të rëndë, pa ngjallur as edhe dyshimin më të vogël. Për më tepër, agjencia thotë që, edhe pse Bouhlel e mori makinën më 13 korrik, rezervimi ishte bërë më shumë se një javë më parë, më 4 korrik.
Dhe ndërsa hetimi është ende në proces dhe nuk ka ende përfundime të sigurta, autoritetet nuk kanë dyshime se masakra në Nicë ishte një akt terrorist me natyrë radikale islamike. “Hetimi do të përcaktojë faktet, por ne e dimë që tani se vrasësi u radikalizua shumë shpejt”, tha kryeministri francez Manuel Valls në deklaratat e botuara të dielën. “Deklarata e të shtunës në mëngjes nga Shteti Islamik dhe radikalizimi i shpejtë i vrasësit, konfirmojnë natyrën islamike të këtij sulmi”, tha kryeministri. /Përgatiti: bota.al
