Eventi i madh i prezantimit të iPhone 17 nga Apple përfundoi – dhe tani që pluhuri ka rënë pas një morie njoftimesh, është koha të përmbledhim momentet kryesore.
Ashtu siç e sugjeronte edhe emri i eventit, “Awe Dropping”, pati shumë risi. Pamë katër iPhone të rinj, përfshirë edhe iPhone Air, për të cilin flitej prej kohësh, si dhe tre modele të reja për adhuruesit e Apple Watch, përfshirë këtu modelin kryesor Apple Watch Ultra 3.
Meqë në këtë ngjarje madhore u prezantuan edhe AirPods Pro 3, ka shumë për t’u diskutuar…
1. iPhone u bë më i hollë
Pas muajsh thashethemesh, iPhone Air ka mbërritur, duke zëvendësuar iPhone 16 Plus me një dizajn të ri, më të hollë dhe më të lehtë.
Dhe sa i hollë është – vetëm 5.6 mm, duke e bërë iPhone-in më të hollë prodhuar ndonjëherë.
Megjithatë, Apple nuk ka bërë kompromise të mëdha për ta çuar në këtë trashësi; iPhone Air ka të njëjtin çip A19 Pro si iPhone 17 Pro, një ekran 6.5 inç me ProMotion, një kamerë të pasme 48MP, si dhe një kamerë të re kryesore 18MP, me funksionin Center Stage.
Sa i përket baterisë, Apple thotë vetëm se zgjat “gjithë ditën” – por mezi presim ta testojmë këtë pretendim.
Sa kushton kjo formë elegante?
iPhone Air fillon nga 999 $ për modelin bazë, i cili ka 256 GB hapësirë ruajtjeje, por mund të përmirësohet në 512 GB ose 1 TB nëse jeni gati të shpenzoni më shumë.
Ashtu si edhe modelet e tjera iPhone 17, ai do të jetë i disponueshëm për blerje në dyqane më 19 shtator.
2. Edhe iPhone 17 Pro dhe Pro Max u ngritën në nivel
Këtë vit, Apple është shumë krenare për iPhone-ët e saj në versionin Pro, pasi iPhone 17 Pro dhe iPhone 17 Pro Max sjellin përmirësime domethënëse pothuajse në çdo aspekt.
Ndryshimi më i dukshëm është dizajni i ri: të dy modelet kanë një bllok të madh kamerash që shtrihet horizontalisht në gjithë pjesën e pasme, të cilin Apple e quan “plateau kamerash në gjithë gjerësinë”.
Ky modul i riprojektuar është i rëndësishëm për dy arsye:
- I ka dhënë mundësi Apple të prezantojë një kamerë telefoto 48MP.
- Ka liruar hapësirë për baterinë më të madhe ndonjëherë në një iPhone.
Përmirësimet e tjera të këtij viti përfshijnë një sistem ftohjeje me dhomë avulli dhe çipin A19 Pro, që ndihmojnë iPhone 17 Pro dhe Pro Max të përmbushin statusin e tyre si iPhone-ët më të mirë që Apple ka prodhuar ndonjëherë.
Çmimet mbeten të njëjta si vitin e kaluar:
- iPhone 17 Pro kushton 1,099 $.
- iPhone 17 Pro Max kushton 1,199 $.
Ndërkohë, është prezantuar edhe një version i ri 2TB për Pro Max, që kushton 1,999 $, duke e bërë atë iPhone-in më të shtrenjtë ndonjëherë.
3. Ndërkohë, iPhone 17 standard u bë më i fuqishëm
Këtë vit Apple solli disa ndryshime edhe për modelin standard. iPhone 17 sjell një sërë përmirësimesh që e bëjnë një hap të plotë më lart, në krahasim me paraardhësin e tij.
Natyrisht, vjen me një çip më të fuqishëm, A19, i cili rrit jetëgjatësinë e baterisë duke shtuar deri në tetë orë shtesë luajtje videosh. Dhe bateria nuk ndikohet as nga përfshirja e një ekrani ProMotion 120Hz, i mbrojtur nga xham Ceramic Shield 2 për rezistencë më të madhe ndaj gërvishtjeve.
Sistemi i ri i kamerave “Fusion” me 48MP përdor dy kamera të pasme: një kryesore, një telefoto me zmadhim optik 2x, një ultra-wide 48MP dhe një makro 1x. Nëse ky sistem sjell foto mbresëlënëse, mund të bëhet standardi që duhet mposhtur këtë vit dhe në vitin që vjen.
Si qershia mbi tortë, Apple nuk ka rritur çmimin e modelit standard: iPhone 17 fillon nga 799 $, një lehtësim i vogël në një kohë tarifash të paqëndrueshme.
4. Center Stage (qendra e skenës) mbërriti te kamera e përparme e iPhone 17
Kamerat për selfie mund të mos jenë tipari më tërheqës i një telefoni, por këtë vit Apple i kushtoi rëndësi të madhe. Të gjithë iPhone-ët e rinj kanë kamera të përparme me sensorë katrorë dhe me funksionin e dobishëm Center Stage.
Center Stage funksionon njësoj si në Mac: ju mban automatikisht në qendër të kornizës gjatë video-telefonatave dhe zmadhohet për të përfshirë të tjerët kur bëni një selfie në grup. Sensori katror bën të mundur gjithashtu që të mos e ktheni telefonin horizontalisht për një selfie panoramik — ai vetë kalon në raportin më të mirë.
Sigurisht që përfshihet pak prerje (cropping), por Apple ka rritur rezolucionin e kamerës së përparme në 18MP, për ta kompensuar këtë. Një përmirësim i vogël, por shumë i dobishëm për të gjithë adhuruesit e selfieve.
5. Por ende nuk ka shenja të të shumëpërfolurit iPhone Fold
Kompani të tjera teknologjike shpesh parapëlqejnë të nxisin pritshmëri për pajisje të reja përpara se t’i prezantojnë plotësisht – dhe madje edhe vetë Apple e tregoi Vision Pro gjashtë muaj para lançimit. Por fatkeqësisht, në eventin e djeshëm nuk pati asnjë gjurmë të iPhone Fold, për të cilin flitet prej kohësh.
A ekziston vërtet? Kur do të vijë? Sa do të kushtojë? – Nuk dimë më shumë sot sesa dinim dhjetë minuta përpara se të fillonte eventi “Awe Dropping”.
Megjithatë… iPhone Air i ri duket si një nga ato telefona tepër të hollë që do të duhej të prodhoheshin nëse Apple do të ishte gati të sillte një model të palosshëm në një të ardhme të afërt… ndaj mbani sytë hapur. / bota.al
