Ndoshta e dinte se do të ishte një derbi për t’u mbajtur mend. Për këtë arsye Luka Modrić kishte ftuar në tribunë rreth gjashtëdhjetë persona të dashur për të, mes familjarëve dhe miqve.
Ndër ta ishin edhe Sergio Ramos dhe Mario Mandžukić.
Ish-fituesi i Topit të Artë bëri edhe një herë një paraqitje të madhe, duke i dhënë siguri skuadrës si në fazën e ndërtimit të lojës, ashtu edhe në fazën pa top. Para mbrojtjes, zikaltërit janë përplasur disa herë me të: ai luftoi dhe bëri presing si një djalosh i ri, pavarësisht se tashmë është 40 vjeç.
Ai ishte ndër më të duartrokiturit në San Siro, nga fillimi deri në fund të ndeshjes, dhe tani i gjithë populli kuqezi kërkon konfirmimin e tij. Me fjalë të tjera, shpreson që kroati të pranojë aktivizimin e opsionit për rinovimin e kontratës, që është parashikuar në marrëveshjen e firmosur qershorin e kaluar.
Klubi, shokët e skuadrës, Allegri dhe tifozët kuqezi shpresojnë që Luka të mos vendosë të largohet nga futbolli i luajtur pas Kupës së Botës.
Për momentin, megjithatë, do të duhet të presin për një përgjigje. Mbrëmë, pavarësisht gëzimit për fitoren, mesfushori nuk zbuloi çfarë ka në mendje: “Gjithmonë ka zëra rreth Milanit, theksoi ai, por mua nuk më interesojnë. Jam shumë i lumtur këtu dhe mendoj vetëm të punoj. Asgjë tjetër. Në stadium ishte Sergio Ramos dhe kur vjen kapiteni (ishim bashkë te Reali i Madridit), duhet të fitosh”, tha duke qeshur. “E luajtëm këtë derbi pak edhe me shpirtin e tij”.
Lider
Numri 14 i Milanit edhe një herë tregoi pse në karrierë ka fituar gjithçka që mund të fitohej, mes tyre edhe gjashtë Champions League.
Me të në fushë, shokët e skuadrës ndihen më të sigurt, jo vetëm kur ai organizon dhe menaxhon topin, por edhe kur duhet të mbrojnë dhe të vuajnë.
Me pak fjalë: është një lider i vërtetë, një goditje e madhe e drejtuesve të klubit që kërkonin një udhëheqës për një skuadër që vitin e kaluar humbiste orientimin në ndeshjet e mëdha.
Mbrëmë kjo nuk ndodhi dhe në momentin më të vështirë, Luka doli në pah. Si një udhëheqës.
“Ne gjithmonë kemi besuar te kjo fitore. Gara për titullin është rihapur? Nuk mendojmë për këtë, ecim ndeshje pas ndeshjeje. Në pjesën e parë bëmë një ndeshje të madhe, në të dytën Interi u përmirësua, por ne mbrojtëm si skuadër dhe i merituam tre pikët”.
Tani vjen pjesa më interesante: me shtatë pikë diferencë nga skuadra e Chivu dhe dhjetë javë deri në fund të kampionatit, Milani mund të përpiqet t’i japë sërish jetë garës për titullin, që dukej se ishte tashmë i destinuar për vitrinën e klubit nga viale della Liberazione.
“Tani duhet të përqendrohemi te fundi i sezonit sepse duhet të vazhdojmë kështu. Ka ende shumë pikë në lojë dhe duhet të marrim sa më shumë, pa menduar për asgjë tjetër”.
Në fund, edhe një koment për polemikat rreth golit të anuluar të Interit:
“Nuk ka dyshime, arbitri fishkëlleu para se topi të hynte”.
Pastaj drejt dhomave të zhveshjes për festën e madhe kuqezi. / bota.al