Vrasja e një profesori të shquar të Massachusetts Institute of Technology (MIT) mbetet e mbështjellë me mister. Nuno Loureiro, 47 vjeç, shtetas portugez, u qëllua për vdekje me armë zjarri në shtëpinë e tij pranë Bostonit. Ai ishte fizikan dhe shkencëtar i specializuar në shkrirjen bërthamore, si dhe drejtor i Plasma Science and Fusion Center në MIT, një nga universitetet më prestigjioze në botë.
Të hënën në mbrëmje, Loureiro u gjet i plagosur rëndë në banesën e tij në zonën rezidenciale të Brookline, dhe ndërroi jetë një ditë më pas në spital, siç bëri të ditur zyra e prokurorit të qarkut Norfolk.
Autoritetet kanë hapur një hetim për vrasje, por deri tani nuk ka pasur arrestime. Megjithatë, burime të forcave të rendit dhe të hetuesve i kanë thënë CNN se policia po heton jo vetëm një lidhje të mundshme mes vrasjes së profesorit të MIT-it dhe të shtënave të ndodhura të shtunën në Brown University, ku një person hapi zjarr duke vrarë dy studentë dhe duke plagosur nëntë të tjerë, disa prej tyre rëndë, por edhe se është identifikuar një i dyshuar, për të cilin është lëshuar një urdhër arresti.
Loureiro iu bashkua MIT-it në vitin 2016 dhe vitin e kaluar u emërua në krye të qendrës ku synonte të promovonte teknologjitë për energji të pastër dhe kërkime të avancuara. Plasma Science and Fusion Center është një nga laboratorët më të mëdhenj të institutit dhe numëronte mbi 250 punonjës, të shpërndarë në shtatë ndërtesa, në momentin kur ai mori drejtimin.
“Nuk është aspak e tepruar të thuhet se MIT është vendi ku gjenden zgjidhjet për problemet më të mëdha të njerëzimit,” kishte deklaruar Loureiro në kohën e emërimit. “Energjia nga shkrirja bërthamore do ta ndryshojë rrjedhën e historisë njerëzore.”
Presidentja e universitetit, Sally Kornbluth, e quajti humbjen “tronditëse”, duke theksuar se profesori “u bë shumë shpejt i njohur si një studiues kreativ, administrator i aftë dhe mentor entuziast”.
I martuar, Loureiro ishte rritur në Viseu, në Portugali. Ai studioi në Lisbonë, më pas mori doktoraturën në Londër, punoi si kërkues në një institut për shkrirjen bërthamore në kryeqytetin portugez dhe më pas u transferua në Massachusetts.
Një fqinj i tij, që kërkoi të mbetej anonim, i tha CBS News se kishte dëgjuar “tre të shtëna të forta” të hënën në mbrëmje. Edhe një studente 22-vjeçare e Boston University, që banon pranë apartamentit të Loureiro-s në Brookline, i tha Boston Globe se kishte dëgjuar tre zhurma shumë të forta: “Nuk kisha dëgjuar kurrë një zhurmë kaq të fuqishme, mendova se ishin të shtëna me armë, shpjegoi Liv Schachner, është e vështirë të besohet, por duket se këto gjëra vazhdojnë të ndodhin”.
Ndërkohë, autoritetet izraelite po shqyrtojnë informacione të rezervuara lidhur me një përfshirje të mundshme të Iranit në vrasjen e shkencëtarit, siç shkruan Jerusalem Post. “Sipas të dhënave të mbledhura ditët e fundit, ekzistojnë indicie për një përfshirje të Teheranit në vrasjen e profesor Loureiro-s,” thuhet në artikull, megjithëse gazeta saktëson se bëhet fjalë për “një vlerësim që ende nuk është verifikuar dhe që në këtë fazë nuk mbështetet nga rezultate zyrtare të autoriteteve hetimore amerikane”. / bota.al
