Poezia “Në mundsh” nga Rudyard Kipling është një nga tekstet më të dashura dhe më të fuqishme të letërsisë botërore, një thesar urtësie që kalon përtej kohës dhe brezave. E shkruar si një mesazh i një babai për të birin, ajo nuk është thjesht poezi, është një udhërrëfyes për jetën, një manual i heshtur për forcën e karakterit, durimin, dinjitetin dhe maturinë përballë sfidave që njeriu has në rrugëtimin e tij.
Me vargje të thjeshta, por thellësisht të ngarkuara me kuptim, Kipling ndërton portretin e njeriut të vërtetë: atij që di të qëndrojë i fortë në humbje dhe i përulur në fitore, që ruan nderin mes tundimeve dhe qetësinë mes stuhive.
Kjo poezi është një ftesë për reflektim mbi atë çfarë do të thotë të rritesh, të përballesh me botën dhe, mbi të gjitha, të mbetesh besnik ndaj vetes, edhe kur gjithçka tjetër lëkundet.
“Në mundsh”, nga Rudyard Kipling”
Në mundsh ta ruash arsyen, kur bota humbet fillin
e fajin ta hedh ty dhe vetes t’i besosh,
sa herë tek ti dyshojnë e s’të përfillin
por edhe dyshimet drejt t’i gjykosh…
Në mundsh të rrish në pritje, nga pritja pa u lodhur,
e, kur t’urrejnë, urrejtje mos t’ushqesh,
madje, ndaj shpifjeve të rrish pa folur,
me thjeshtësi, me to pa rënë ndesh…
Në mundsh t’mendosh, por jo gjer në shkatrrim,
të ëndërrosh, por jo si rob ëndërrimesh,
dhe t’i trajtosh njëlloj e pa dallim
ngadhnjim e shpartallim burim mashtrimesh. ..
Në durofsh dot thëniet e tua të drejta
në kurthe për trutharët, kopuket që t’i kthejnë,
t’i shohësh të thyera gjërat më të shtrenjta
e prapë t’i ndërtosh me vegla që nuk vlejnë…
Në mundsh fitoret që ke korrur t’i flijosh
si në kumar, në një të vetme lojë,
të rrezikosh, të humbasësh e prapë t’ia fillosh,
dhe humbjen kurrë të mos e zesh në gojë…
Në i detyrofsh dot muskul, nerv e puls e zemër
të të shërbejnë edhe kur gjithçka duket e kotë,
e të qëndrosh kur s’ke asgjë më veç vullnetit,
që vetëm fjalën “Qëndro!” gjithmonë të thonë…
Në mundsh të flasësh me maskarenj, por nderin tënd ta ruash
e t’ecësh përkrah mbretit pa krenari që të verbon…
Nëse armiku apo miku s’të bëjnë dot të vuash,
dhe gjithkend e çmon, por veç sa meriton…
Në mundsh t’i mbushësh ti minutat aq të rënda
me vepra që peshojnë
dije dhe mos kij asnjë dyshim,
se jotja do të jetë bota, me ç’ka brenda,
dhe burrë do të jesh, biri im!
Poezia “Në mundsh” e Rudyard Kipling mbetet një thirrje e qetë, por e fuqishme, për të jetuar me dinjitet, vetëpërmbajtje dhe guxim moral. Sepse madhështia e vërtetë nuk qëndron te fitoret e mëdha apo lavdia e jashtme, por te aftësia për të qëndruar të fortë kur gjithçka duket se shembet, për të mos humbur kurrë njerëzoren brenda nesh.
Dhe pikërisht në këtë rrugëtim të brendshëm, mes sfidave dhe zgjedhjeve të përditshme, njeriu ndërton atë që Kipling e quan fitoren më të madhe: të bëhesh vërtet njeri. / bota.al
