Presidenti Trump ndodhet në një përplasje me njeriun më të pasur të botës, i cili nuk është aspak një kundërshtar i zakonshëm.
Që kur mori detyrën në janar, Presidenti Trump është përballur me pak ose aspak opozitë me peshë.
Kongresi ka qenë i bindur dhe dukshëm i painteresuar për të ushtruar mbikëqyrje. Ai ka anashkaluar gjykatat për të vendosur vullnetin e tij mbi politikat e imigracionit dhe për të marrë hak ndaj firmave ligjore dhe universiteteve. Mediat konservatore e kanë mbështetur atë dhe agjendën e tij, ndërsa disa media kryesore janë treguar të përmbajtura.
Por tani, Trump nuk po përballet vetëm me një kundërshtar të fuqishëm për herë të parë këtë vit — ai po përballet drejtpërdrejt me një rival të zemëruar si Elon Musk, i cili ka kapacitetin për të vazhduar betejën dhe ndan me presidentin instinktin për të goditur rëndë kundërshtarët dhe për të përdorur çdo mjet, për të fituar qoftë edhe një përparësi afatshkurtër.
Është një sfidë e re për Donald Trumpin, i cili gjithmonë ka pasur talentin për të trembur dhe poshtëruar rivalët dhe për të përdorur rrjetet sociale dhe fuqinë e presidencës për të shkatërruar çdo opozitë.
Musk, i cili zotëron X dhe ka 220 milionë ndjekës, mund të konkurrojë ose ndoshta të tejkalojë fuqinë e zërit të Trump në rrjetet sociale, duke pasur parasysh shtrirjen e kufizuar të Truth Social, platformës së presidentit.
Nëse do të ishte një përballje e ngjashme me ngacmuesit në shkolla ose përbindëshat kinematografikë, do të ishte një betejë e vërtetë.
“Është tamam si Godzilla kundër Kongut,” tha Costas Panagopoulos, profesor i shkencave politike në Universitetin Northeastern.
Por përtej tërheqjes që ka kjo përballje mes dy njerëzve më të fuqishëm në botë, ka shumë gjëra në lojë.
Beteja e tyre vjen në një moment kur Trump po zhvillon një manovër delikate në Kongres për të kaluar legjislacionin e tij kryesor, të quajtur “Projektligji i Madh i Bukur,” si dhe për të negociuar mbylljen e disa konflikteve të jashtme, që kanë qenë shumë më të vështira sesa kishte parashikuar.
Nuk është e qartë se sa gjatë do të vazhdojë përplasja e tyre, të paktën me intensitetin që u pa të enjten. Dhe Musk, pronar i SpaceX dhe Tesla, ka shumë për të humbur nga një betejë e zgjatur me Trumpin, i cili ka një kontroll të fortë mbi Partinë Republikane dhe fuqinë për të dëmtuar interesat e Musk.
Por konflikti i tyre ka nxjerrë për herë të parë në pah disa dobësi të Trumpit, që më parë ishin mbuluar.
Zakonet e shpenzimeve të mëdha të presidentit kanë irrituar prej kohësh një grup të vogël ligjvënësish me prirje libertariane, të cilët shpesh shprehin shqetësime për borxhin në rritje të vendit, por zakonisht janë detyruar të heshtin. Tani, me Musk që i bashkohet kauzës së tyre, ata kanë më shumë mbështetje, duke rrezikuar kalimin e projektligjit që mbart agjendën e brendshme të Trumpit, e cila përfshin miliarda në ulje taksash, financim për murin kufitar dhe kufizime për Medicaid — por gjithashtu edhe një rritje të tavanit të borxhit.
Përplasja Trump-Musk mund të kthehet gjithashtu në një shpërqendrim të madh teksa administrata përpiqet të zhvillojë negociata të vështira në çështje tregtare, lufte dhe paqe, përfshirë edhe me Rusinë, Iranin dhe Kinën. Musk sugjeroi të enjten se strategjia e tarifave e Trumpit, mund të shtyjë Shtetet e Bashkuara drejt një recesioni më vonë këtë vit, një shqetësim që ndajnë edhe disa ekonomistë.
Ekziston gjithashtu çështja e punëve të rëndësishme të Musk në fushën e hapësirës përmes kompanisë së tij SpaceX, nga e cila qeveria federale varet shumë. Pasi Musk sulmoi presidentin, Trump kërcënoi të anulonte kontratat e tij. Biznesmeni miliarder tha se do të fillonte çmontimin e një kapsule që përdoret për të transportuar astronautë dhe furnizime në Stacionin Ndërkombëtar të Hapësirës.
Todd Belt, drejtor i programit të menaxhimit politik në Universitetin George Washington, parashikoi se nëse të dy nuk i zbusin marrëdhëniet, mund të përfundojnë duke mbështetur kandidatë të ndryshëm në zgjedhjet paraprake republikane në vitin 2026.
“Elon Musk është një njeri që i pëlqen të rrezikojë, dhe bizneset e tij janë aq thellësisht të lidhura me qeverinë saqë nuk mund ta shohësh të largohet nga politika,” tha Belt. “Kështu që mendoj se, në fund, mund të shohim kandidatë të Musk dhe kandidatë të Trump në parapraket e 2026-ës.”
Trump u ngjit në politikë pjesërisht falë talentit të tij për të identifikuar dobësitë e kundërshtarit dhe për t’i tallur ata pa mëshirë. Shprehjet e tij, si “Jeb pa energji” Bush dhe “Marco i vogël” Rubio, ndihmuan në shkatërrimin e fushatave rivale dhe ose i larguan kundërshtarët nga politika, ose i detyruan të përkulen para tij.
Por tani, te Musk, ai ka gjetur një kundërshtar që zotëron aftësi të forta në rrjetet sociale dhe një prirje për të goditur poshtë brezit.
Gjatë gjithë ditës së enjten, të dy shkëmbyen goditje në platformat e tyre sociale: Trump e sulmoi Musk në Truth Social, duke sugjeruar se kundërshtimi i tij ndaj projektligjit ishte i motivuar nga lakmia dhe dëshira për subvencione për automjetet elektrike për Teslën; ndërsa Musk e ofendoi presidentin në platformën e tij shumë më të madhe, X, dikur e njohur si Twitter.
Edhe pse përplasja mes Trump dhe Musk filloi si një mosmarrëveshje për politika, ishte Musk ai që e baltosi shpejt, duke sugjeruar se presidenti mund të ishte i përfshirë në hetimin për trafik seksual të Jeffrey Epstein, një multimilioner që vari veten në një burg federal në Nju Jork në vitin 2019.
Më pas ai mbështeti shkarkimin e Trump nga detyra dhe premtoi se do të qëndronte më gjatë në politikë se ai.
“Trump ka edhe 3.5 vite si president,” shkroi Musk në X, “por unë do të jem vërdallë edhe për 40 vjet të tjera.”
Presidenti, i cili fillimisht kishte përdorur kritika të buta duke thënë se ishte “i zhgënjyer” nga Musk, deklaroi shpejt se miliarderi kishte “çmendur fare!”
Aleatët e Trumpit e morën betejën në dorë dhe dolën në krah të tij: Stephen K. Bannon, një nga ish-këshilltarët e presidentit, bëri thirrje që Musk të deportohej. Ndërsa mbështetësit e Musk, nga ana tjetër, e sulmuan presidentin në internet, madje edhe në platformën e tij.
“Trump gjithmonë ka qeverisur përmes kaosit, por kushdo që mendonte se një mandat i dytë do të ishte i disiplinuar dhe i qetë, tashmë është çliruar nga ky iluzion,” tha William G. Howell, dekani i Fakultetit të Shkencave të Qeverisjes dhe Politikave në Universitetin Johns Hopkins. “Dhe megjithatë, edhe kur e di çfarë po vjen, është e vështirë të mos befasohesh vazhdimisht nga niveli i helmit dhe sa publik dhe i menjëhershëm është. Është vërtet e jashtëzakonshme.”
Në Kongres, republikanët janë treguar të kujdesshëm për të mos thënë asnjë fjalë të keqe për asnjërin dhe shpresojnë se mund ta presin këtë luftë fjalësh pa pasur nevojë të marrin anë. Ata janë prej kohësh të frikësuar të kundërshtojnë Trumpin, dhe këtë javë, ndërsa Musk e sulmonte projektligjin e presidentit, ata u përpoqën të qetësonin miliarderin, edhe pse ai kërcënonte t’i rrëzonte nëse mbështesnin agjendën e Trumpit.
Senatori Mike Lee, republikan nga Utah, e përmblodhi situatën e vështirë në të cilën ndodheshin ligjvënësit republikanë, si një fëmijë që duhet të zgjedhë me cilin prind të qëndrojë pas divorcit. “Por … unë i dua të dy,” shkroi Lee në X. / NYT – Bota.al
