Amerikanët që spiunonin Berluskonin në vitin 2011 shfaqen pothuaj të brishtë. Në atë kohë nuk kishte nevojë të ndërtoje sisteme shumë të ndërlikuar përgjimi, për t’u informuar mbi veprimtarinë e ish presidentit të këshillit të ministrave në Itali: mjafton të dilje dhe të blije në kioskë një gazetë italiane çfarëdo. Ndërkohë ndryshon përplasja mes Apple dhe FBI.
FBI kërkon informacionet që përmban iPhone i Syed Rizvan Farook, një prej atentatorëve që në 2 dhjetor 2015, vranë katërmbëdhjetë persona në San Bernardino, Kaliforni.
Pas dhjetë tentativave për të zhbllokuar iPhonen e mbrojtur nga një fjalëkalim, telefoni i anulon të gjithë të dhënat. Për këtë arsye, FBI i ka kërkuar Apple një mënyrë për të shmangur pengesën dhe rrezikun e humbjes së informacioneve që përmban telefoni. Por pasojat e mundshme janë të rëndësishme, ndoshta më shumë se sa parimet. Apple refuzon të bashkëpunojë, duke thënë se nëse ia plotëson këtë herë kërkesën FBI-së, rrezikon që të detyrohet ta bëjë sërish, ndoshta edhe me qeveri të huaja. Dhe se kur i hapet porta e hyrjes një sistemi informatik, më pas mund të futen edhe kriminelë dhe diktatorë, që janë të interesuar të dijnë se çfarë kemi në telefonat tanë: mesazhe, fotografi, filmime, të dhëna personale, lëvizje.
Apple i ka bërë të papenetrueshëm telefonat e vet, vetëm pas zbulimeve të Eduard Snoudenit, ish teknikut të National Security Agency që ka rrëfyer se në çfarë mënyre, agjencia amerikane e sigurisë ia kishte dalë të siguronte prej kompanive kryesore të telekomunikacionit (mes tyre dhe vetë Apple), aksesin në të dhënat e përdoruesve të tyre.
“Eshtë një strategji marketingu”, ka thënë FBI, duke komentuar pozicionin e Apple. Por nga kompania më e madhe amerikane e kuotuar në bursë, do të ishte e vështirë të pritet diçka e ndryshme. Siç ka shkruajtur Snoudeni, është nëj situatë paradoksale: “FBI po krijon një botë ku qytetarët besojnë tek Apple për të mbrojtur të drejtat e tyre”, dhe jo e anasjellta. /Internazionale – Bota.al
