Fitorja e Shqipërisë përballë Rumanisë në Kampionatin Europian të Francës ka bërë xhiron e Europës dhe Botës, duke ‘pushtuar’ titujt dhe faqet e para të mediave prestigjioze, ndërsa kuqezinjtë kanë marrë edhe falënderimet e UEFA-s. Nga mediat fqinje, në të gjithë Europën dhe në deri në SHBA ka bërë jehonë të madhe fitorja e ekipit kombëtar në Euro 2016.
Titujt e mediave botërore kanë lartësuar paraqitjen e Shqipërisë, teksa më i godituri vjen nga Spanja, aty ku gazeta më e madhe sportive ‘Marca’ shkruan se “Bota njeh Shqipërinë” ndërsa spanjollja tjetër ‘AS’ e vendos theksin te shpresa e kuqezinjve për në raundin tjetër.
Në Francë prestigjiozja “France Football” shkruan se Shqipëria nuk u dorëzua pas dy humbjeve të para edhe pas lojës së mirë dhe fitores me Rumaninë e mbanë në garë për kalimin e grupit.
Francezja tjetër “L’Equip” i kushton artikullin e madh sulmuesit elbasanas që luan në Zvicër, pasi goli i tij i dha fitoren Shqipërisë. “Shqipëria shpreson pas golit të Sadikut, Rumania eliminohet”.
Në ishullin britanik “The Guardian”, “Daily Mail” dhe “The Sun” vlerësojnë maksimalisht njëzëri paraqitjen e Shqipërisë duke i thurur elozhe pa fund.
“The Guardian” e hap me titullin “Shqipëria merr fitore historike, tashmë kualifikimin për në fazën e eliminimeve do të varet nga rezultat e ekipeve të tjera”.
“Shqipëria çmendet për fitoren e parë në një turne madhor” shkruan BBC. Ndërsa për “The Sun” thekson “Ata bënë historinë”.
“Shqipëria në festë! Marrin fitoren e parë në Evropian”, është titulli i “Bild” pas fitores së Shqipërisë në Euro 2016 përballë Rumanisë.
Në Itali “La Gazzetta dello Sport”: “Rumani-Shqipëri vendos Sadiku. De Biasi shpreson për një raund të dytë”.
Dorëzohen edhe zviceranët, teksa paraqesin me nota maksimale paraqitjen e Shqipërisë dhe golin e Sadikut.
“Blick” shkruan se me golin e Sadikut dhe fitoren Shqipëria mban shpresat për të shkuar në fazën tjetër.
E ndërsa në të gjithë Europën flitej për suksesin kuqezi, në Rumani shtypi ishte në zi, pasi të gjitha mediat kanë ‘kryqëzuar’ trajnerin dhe kombëtaren për paraqitjen e dobët.
