Pjeshkët dhe nektarinat janë fruta të kësaj stine dhe Shqipëria është e pasur me zona, të cilat merren me kultivimin e tyre. Por cilat janë vlerat e pjeshkëve në organizmin e njeriut? Ato kanë funksione nga më të ndryshmet, që nga ndihma në “luftën” kundër obezitetit, reduktimin e kolesterolit, mbrojtjen dhe përmirësimin e shikimit, mirëfunksionimin e indit kockor dhe të dhëmbëve. Nga ana tjetër, ato janë të pasura me antioksidantë dhe detoksifikues, të cilat na mbrojnë edhe nga plakja. Pjeshkët ndihmojnë edhe në rregullimin e funksionit të aparatit tretës, duke lehtësuar edhe motorikën e zorrëve. Më poshtë keni të listuara disa nga vlerat e frutit të pjeshkës në organizmin tonë:
- Pjeshkët përmbajnë antioksidantë, si luteina, zeaksantina etj. Kjo gjë do të thotë mbrojtje e organizmit nga radikalet e lirë të oksigjenit, si peroksidet apo superoksidet, të cilat janë toksike dhe shkaktojnë dëme në organizëm. Përmbajtja e lartë në zink ndihmon gjithashtu nga këto radikale të lira duke parandaluar edhe plakjen e parakohshme.
- Pjeshkët përmbajnë sasi të lartë të kaliumit për funksionimin e mirë të sistemit nervor. Pakësimi i sasisë së kaliumit jep probleme me punën muskulare dhe shprehet me shtim të rrahjeve të zemrës, deri në arrest kardiak, në rastet më të rënda të hipokalemisë.
- Pjeshkët ndihmojnë në tretjen e ushqimeve dhe në parandalimin e obezitetit. Ato përmbajnë përbërës të rëndësishëm që ndihmojnë në ruajtjen e motorikës së zorrëve duke lehtësuar tretjen, thithjen e molekulave të nevojshme dhe në eliminimin e atyre të panevojshme për organizmin.
- Pjeshkët ndihmojnë në reduktimin e nivelit të kolesterolit në gjak. Mendohet se përbërësit e fenoleve, të cilat ne i marrim nga konsumimi i pjeshkëve ndihmojnë në mbajtjen e tij të ulët dhe në reduktimin e LDL-kolesterolit (kolesterolit “të keq”), si dhe në rritjen e HDL-kolesterolit (kolesterolit “të mirë”).
- Ndihmojnë në sistemin imunitar, pasi janë të pasura me acid askorbik, i cili përbën po të njëjtën gjë sikurse vitamina C. Pra, ne me konsumimin e pjeshkëve marrim edhe vitaminë C, e cila na ndihmon në shërimin e plagëve, në largimin e infeksioneve dhe në mbrojtjen nga infeksionet e ndryshme. / bota.al
