Bëhet fjalë për një software për të shpëtuar jetë njerëzore. Një teknologji me zbulim proaktiv të një inteligjence artificiale do të skanojë të gjitha mesazhet e Facebook-ut në kërkim të mendimeve vetëvrasëse dhe kur është e nevojshme do t’i dërgojë përdoruesit në risk burime të shëndetit mendor ose miqve të tij, ose do të vihet në kontakt me shërbimet e urgjencës. Rrjeti social kishte filluar provat për zbulimin proaktiv në Amerikë, por tani do ta shtrijë këtë shërbim edhe për pjesën tjetër të botës, me përjashtim të Europës, ligjet e së cilës për ruajtjen e privatësisë ndalojnë përdorimin e kësaj teknologjie. Ky plan është realizuar në bashkëpunim me organizata të shëndetit mendor si “Save.org,” “National Suicide Prevention Lifeline y Forefront Suicide Prevention” si dhe me mbështetjen e personave që kanë patur një përvojë ose kanë tentuar të vetëvriten. Në një postim zyrtar Mark Zuckerberg kishte paralajmëruar se inteligjenca artificiale do të jetë e aftë të kuptojë gjuhën me një saktësi akoma më të madhe për të parandaluar lloje të ndryshme problemesh. “Në të ardhmen inteligjenca artificiale do të jetë e aftë të kuptojë ngjyrimet e gjuhës dhe do të jetë e aftë të identifikojë tema përtej vetëvrasjes si shprehje bullizmi, manifestime të urrejtjes,” –shkroi Ceo-ja i kompanisë. Me këtë risi facebook-u kërkon të parandalojë raste që kanë lindur në platformën e tij në të kaluarën dhe kanë kulmuar në tragjedi. / excelsior.com – Bota.al
