Bullgaria ka njoftuar se shkollat do të qëndrojnë të mbyllura deri në shtator, në mënyrë që të parandalojnë përhapjen e koronavirusit, teksa mësimi do të zhvillohet online.
“Ne kemi arritur një konsensus me prindërit, mësuesit dhe zyrtarët e shëndetësisë që viti shkollor të përfundojë në internet,” tha sot ministri i arsimit Krasimir Valçev para gazetarëve.
Përjashtimet e vetme nga mbyllja e shkollave do të jenë për ata që mbajnë provime të rëndësishme në klasat e 7-të dhe të 12-të, shtoi Valçev.
Jo më shumë se 10 studentë do të futen në klasë, duke respektuar në mënyrë rigoroze rregullat e distancimit dhe dezinfektimit, tha ministri.
Ndërsa viti i ri shkollor është planifikuar të fillojë në mes të shtatorit si zakonisht, kopshtet e fëmijëve do të qëndrojnë të mbyllura për një kohë të pacaktuar.
Më 6 mars, madje para se Covid-19 të mbërrinte në Bullgari, një epidemi e gripit i nxiti autoritetet të mbyllnin orët e mësimit për 708,000 nxënës të shkollës fillore dhe të mesme të vendit.
Ata qëndruan të mbyllur ndërsa vendi vepronte për të kufizuar përhapjen e koronavirusit.
Mësuesit kanë kaluar në mësimdhënie në internet, ndërsa punonjësit socialë u kanë shpërndarë materiale shkollore fëmijëve, veçanërisht atyre në lagjet rome, të cilët nuk kanë kompjutera. Mësimet janë transmetuar edhe në televizionin publik.
Bullgaria, një vend me më pak se shtatë milion njerëz deri më tani ka regjistruar vetëm 1.689 raste të koronavirusit dhe 78 vdekjeve./bota.al/
