Janë të shumtë ata që presin një rikthim të fuqishëm të kompanisë në Cupertino, pasi kompania e Tim Cook ka parë Google t’i marrë vendin e parë si marka me më shumë vlerë. Ja çfarë duhet të presim
Dy orë prezantim, për t’i ulëritur botës se Apple do të vazhdojë të jetë kundërshtari që duhet mundur. Konferenca e zhvilluesve të aplikacioneve fillon pas një jave, të martën e 2 qershorit, dhe vjen në një moment veçanërisht delikat për ekuilibrat e sektorit: rivalët si Google, që ka marrë kreun e klasifikimit të markave me më shumë vlerë, pikërisht duke zhvendosur në vendin e dytë kompaninë Apple, dhe Amazon që ka zbritur në terren me Fire TV dhe e gatshme të hyjë në lojë edhe me një smartphone, janë gjithnjë e më luftarake. Fronti kinez, me lindjen e “monstrës” së re Lenovo-Motorola dhe përparimi i Huawei, ngjall frikë. Dhe ai korean vazhdon të shtyjë fort. Jo më kot Apple nuk u kënaq nga vendimi i fundit në favor të saj dhe kërkoi tërheqjen nga tregu të aparateve Samsung që shkelin të drejtat e saj të autorit, si dhe fillimin e një procesi të ri. Ndërkohë, prodhuesi i linjës “Galaxy”, sipas zërave të fundit, është duke përgatitur një orë dore në gjendje të telefonojë, të lidhet në internet, të bëjë fotografi dhe të masë parametrat fizikë pa u lidhur fare me celularin.
Martesa me Beats Music
Por nuk janë aq shumë stimujt e jashtëm, që të bëjnë të mendosh për një provë force të afërt nga ana e Tim Cook, se sa është nevoja për të ndryshuar ritëm në një seri fushash me rëndësi. Duke filluar nga muzika. Në fillim të muajit dukej shumë pranë blerja e Beats Music dhe konferenca e 2 qershorit mund të jetë rasti i mirë për ta shpallur zyrtarisht, si dhe për të zbuluar rolin që do të ketë tek Apple Jimmy Iovine, producent diskografik dhe bashkëthemelues i kompanisë së krijuar nga repisti Dr. Dre. Ndërkohë, duket se iOs 8, sistemi i ri operativ që do të tërheqë një pjesë të madhe të vëmendjes që nga e marta e ardhshme, do të ketë një aplikacion të posaçëm për iTunes Radio dhe do të jetë në gjendje të njohë titujt e këngëve në ambientin rrethues, sipas një marrëveshjeje të bërë me Shazam (është një risi që së fundmi po e fut edhe Facebook).
Platforma Healthbook
Ndërkohë që për risitë në fushën e pagesave me celularë duhet të presim vjeshtën, kur do të zbulohet iPhone 6 me praninë e sensorit Nfc, një hap i sigurtë drejt monitorimit të parametrave fizikë do të paraqitet që në konferencën e zhvilluesve të aplikacioneve në 2 qershor, me Healthbook. Do të shfaqet ndoshta në krah të të shumëpriturës iWatch, orës inteligjente që megjithatë të tjerë thonë se do të vijë bashkë me telefonin e radhës në vjeshtë.
Koha e Apple TV
Nëse me iOs 8 priten edhe harta të përmirësuara dhe do të kemi edhe kalimin e stafetës nga kërkimi në internet me Google, tek ai me Yahoo!, surpriza do të ketë edhe për të riun Mac OS X 10.10. Eshtë e mundur që Yosemite, pasardhësi i Mavericks do të ketë një pamje të ngjashme me sivëllain e tij në celular dhe iPad. Dyshimet e vigjiljes vërtiten edhe përret Apple TV, qoftë si set-top-box, qoftë si një linjë hipotetike ekranesh të vërtetë. Mund të ketë ardhur koha për t’i prezantuar.
MacBook Air i ri
Në skenë mund të dalë edhe një MacBook Air me Retina Display si dhe një iPad, në kundërpërgjigje ndaj Surface Pro 3 që Microsoft e nxorri javën që kaloi. E sigurtë është që të martën e ardhshme, në orën 19, sytë e të gjithë botës do të jenë të drejtuar në San Francisco, për të zbuluar se si Apple do të vazhdojë të diktojë linjën që do të ndiqet.
