Arritja e lumturisë është një dëshirë e përbashkët për të gjithë qeniet njerëzore. Megjithatë, shpesh përballemi me një armik që na pengon në këtë rrugë: veten tonë, për shkak të kufizimeve që i imponojmë vetes, qoftë me vetëdije apo pa vetëdije.
Shumë njerëz kapen fort pas disa ideve me bindjen se ato përfaqësojnë atë që u nevojitet për të qenë të lumtur, por në realitet, ato vetëm sa zvogëlojnë aftësinë e tyre për të arritur lumturinë e vërtetë. Problemi kryesor qëndron te vetë përcaktimi i lumturisë, pasi, siç shkruante James E. Talmage, një nga dilemat më të mëdha të njeriut të sotëm është të dallojë ndryshimin midis lumturisë dhe kënaqësisë.
“Lumturia nuk nënkupton domosdoshmërisht sukses, mirëqenie ose arritje të mëdha; ajo shpesh buron nga gëzimi i përpjekjes plot shpresë, nga përkushtimi i energjive tona ndaj një qëllimi të drejtë. Rrënja e lumturisë së vërtetë është mbjellë në sakrificë, dhe lulja e saj është dashuria.”
(William George Jordan)
Çlirohuni nga zinxhirët për të qenë më të lumtur
Duke marrë parasysh stilin e jetesës së sotme, për të qenë të lumtur nuk duhet të bëni më shumë apo të arrini më shumë; ajo që duhet të bëni është të lëshoni, të ndaloni së bëri dhe të hiqni dorë nga disa modele sjelljeje.
Megjithëse jetojmë në një epokë lirie, mbetemi ende të lidhur me një sasi të madhe zinxhirësh të padukshëm që nuk na lejojnë të jemi vetvetja.
Çlirimi nga këto zinxhirë dhe braktisja e disa ideve na afron më shumë me lumturinë sesa çdo gjë tjetër. Ja cilat janë idetë nga të cilat duhet të hiqni dorë:
Mos kërkoni miratimin e të tjerëve
Filloni të mendoni për pritshmëritë tuaja dhe mos u varni nga opinionet e të tjerëve. Mos lejoni që të tjerët të manipulojnë vendimet tuaja apo të organizojnë jetën tuaj. Jetoni sipas vlerave tuaja. Nëse jeni të varur nga bindjet e të tjerëve, atëherë do bëni gjërat për ta, duke ndjekur interesat e tyre. Po interesat tuaja cilat janë?
Çlironi veten nga zemërimi dhe mëritë
Zemërimi dhe mëritë ju gërryejnë nga brenda. Ju ndëshkoni veten, bëheni të palumtur dhe mbani mbi supe një barrë që e ka shkaktuar dikush tjetër. Mësoni të jetoni në paqe me ata që ju kanë lënduar. Falja do t’ju bëjë të ndiheni më të lehtë, sepse ai që ju zemëron edhe ju kontrollon. Rimerrni kontrollin mbi veten duke hequr dorë nga mëritë dhe duke falur.
Hiqni dorë nga ideja e përsosmërisë
Të synosh përsosmërinë në disa fusha është e lavdërueshme, sidomos në aspektin shpirtëror. Të duash dhe të vlerësosh përsosmërinë është diçka pozitive, por të jetosh për përsosmërinë është krejt tjetër. Hiqni dorë nga ideja e trupit perfekt, partnerit perfekt, jetës perfekte, gjërave perfekte. Kërkimi i vazhdueshëm i përsosmërisë mund të kthehet në një obsesion dhe madje t’ju pengojë të ecni përpara.
Hiqni dorë nga ideja se pasuria dhe fati janë simbole të lumturisë
Me siguri e keni dëgjuar shprehjen: “Paratë nuk sjellin lumturi.” Shumë njerëz, për të justifikuar pakënaqësinë e tyre, thonë: “Ndoshta jo, por sigurisht që ndihmojnë.” Në realitet, problemi i tyre nuk janë paratë, por mungesa e një kuptimi në jetën e tyre, gjë e cila i bën të palumtur. Paratë nuk kanë të bëjnë me lumturinë. Ajo që ka rëndësi është mënyra se si vlerësoni atë që keni dhe atë që përjetoni, pavarësisht nga pasuria juaj.
“Pasuria e një njeriu nuk qëndron në pronat e tij, por në atë që ai lë pas për botën.”
(Yasmina Khadra)
Mos kërkoni më justifikime
Mos kërkoni justifikime. Nëse diçka nuk shkon, veproni. Nëse ju nevojitet diçka që nuk e keni, punoni për ta arritur. Nëse nuk mund ta arrini atë që ju duhet, kërkoni një alternativë. Nëse dëshironi të mësoni ose të provoni diçka të re, çfarë po prisni për të filluar? Nëse diçka nuk ju pëlqen, ndryshojeni. Nëse nuk mund ta ndryshoni, atëherë ndryshoni veten. Dëshironi rezultate? Atëherë çfarë po prisni?
“Kini kujdes kur thoni se është shumë vonë. Ky është thjesht një justifikim për t’u dorëzuar. Askush nuk mund t’ju pengojë të arrini sukses, përveç vetes tuaj.”
(Wang Deshun)
Hiqni dorë nga kokëfortësia
Mos u tregoni kokëfortë dhe pranoni gabimet tuaja njëherë e mirë. Pranoni se mund të keni pasur mendime të gabuara dhe sjellje jo produktive. Të pranosh dhe të korrigjosh gabimet nuk të bën të dukesh i dobët. Sa më pak kokëfortë dhe të ngurtë të jeni, aq më shumë do të jeni të hapur ndaj ndryshimeve pozitive dhe do të jeni më fleksibël për të zgjidhur problemet.
“Dallimi midis këmbënguljes dhe kokëfortësisë është se e para buron nga një forcë e madhe vullneti, ndërsa e dyta nga një refuzim i madh.”
(Henry Ward Beecher)
Lini pas “bagazhin” tuaj emocional
Tërheqja pas vetes e barrës së emocioneve negative nga përvojat e së kaluarës vetëm sa do ta bëjë rrugën tuaj më të vështirë. Mos jetoni më në të kaluarën. Mësoni prej saj, falni dhe ecni përpara për të qenë të lumtur. Mbajtja e dhimbjes së kaluar do t’ju pengojë të shihni mundësitë e tashme dhe do të dëmtojë aftësinë tuaj për të gjykuar njerëzit që takoni në rrugëtimin tuaj. / bota.al
