28-vjeçari ishte në krye dhe në qendër të triumfeve të klubit dhe kombëtares të tij sezonin e kaluar, dhe roli i jashtëzakonshëm që ai luan është njohur më në fund
“Mesfushorët më të mirë nuk shfaqen në faqet e para të gazetave,” thoshte Pep Guardiola në shkurt 2021. “Ata fshihen pas skuadrës, por kur skuadra luan mirë është sepse ata janë të jashtëzakonshëm.” Trajneri i Manchester City i referohej Rodrit, i cili kishte qenë në krahun e tij vetëm për një sezon e gjysmë në atë kohë.
Këto komente erdhën menjëherë pas një periudhe të rrallë djersitjeje për Cityn, i cili kishte mbetur shumë pas Liverpool-it në garën për titull të sezonit të mëparshëm dhe kishte bërë një fillim të dobët në sezonin 2020-21, duke marrë 16 pikë nga 12 ndeshjet e tyre të para. Por që atëherë ata ishin kthyer në më të mirën e tyre, duke siguruar fitoren e 10-të radhazi në ligë duke mposhtur Liverpoolin 4-1 në Anfield. Dhe Rodri kishte qenë një arsye kryesore.
Guardiola e vlerësoi punën e tij, por në atë kohë ndikimi i spanjollit te City ishte i nënvlerësuar. Në të vërtetë, as Guardiola nuk e vlerësoi plotësisht, pasi e la Rodrin në stol për humbjen në finalen e Champions League nga Chelsea në fund të asaj sezoni.
Por, pas gati katër vjetësh, Rodri ka qenë në faqet e para të gazetave në mbarë botën. Ai mund të mos marrë të njëjtin nivel lavdërimi si bashkëlojtarët Erling Haaland ose Phil Foden, por ndikimi i tij tek Manchester City dhe Spanjë tani vlerësohet botërisht.
Ai nuk “fshihet pas ekipit”; ai është në qendër të klubit dhe kombëtares dhe sezonin e kaluar fitoi dy nga çmimet më prestigjioze në futboll, titullin e Premierligës me Cityn dhe Kampionatin Evropian me Spanjën. Dhe të hënën ai mori vlerësimin që meriton duke fituar Topin e Artë 2024.
Konkurrent serioz edhe më parë
Rodri ishte një pretendent serioz për Topin e Artë 2023 dhe do ta kishte merituar pasi fitoi tre tituj me Cityn dhe shënoi golin e vetëm në finalen e Ligës së Kampionëve ndaj Interit, përgjigja perfekte pas qëndrimit në stol në Porto dy vjet më herët.
Por kontributi i tij u la disi në hije nga 52 golat e Haaland në 53 ndeshje, që do të thotë se ai nuk ishte as lojtari më i vlerësuar i Cityt, duke u renditur i pesti ndërsa norvegjezi doli i dyti.
Lionel Messi siguroi Topin e tij të tetë të Artë, pasi ai ishte ende duke shijuar xhiron e nderit për fitimin e Kupës së Botës me Argjentinën. Megjithatë, kontrolli i hekurt i Messit në çmim ka përfunduar më në fund tani, dhe është Rodri ai që ka marrë kurorën.
74 ndeshje pa humbje
Kontributi i Rodrit në tre titujt nuk llogaritet në Topin e Artë të këtij viti, i cili vlerësohet në bazë të arritjeve në sezonin 2023-24 dhe turnetë verore. Por kjo kishte pak rëndësi, pasi ai ishte në formë edhe më të mirë sezonin e kaluar.
Ai e përfundoi sezonin e Premier League pa humbur asnjë ndeshje, teksa të tre humbjet e Cityt erdhën kur ai ishte i pezulluar. Herën e fundit që ai humbi një ndeshje kampionat ishte në shkurt 2023.
Rodri gjithashtu nuk humbi një ndeshje të Champions League sezonin e kaluar, me Cityn që u eliminua nga Real Madrid në çerekfinale me penallti pas dy barazimeve. Ndeshja e vetme në të cilën ai u mund ishte finalja e Kupës FA kundër Manchester United, e cila i dha fund një serie rekord të pamposhtur për Cityn, e cila zgjati 74 ndeshje në të gjitha garat dhe 475 ditë.
Megjithatë, nuk e prishi sezonin e tij, pasi City siguroi kurorën e kampionatit për herë të katërt radhazi, skuadra e parë që e bën këtë në 135 vjet të futbollit anglez.
‘Jepjani Topin e Artë tani’
Në mars, Guardiola e quajti atë “mesfushori më i mirë në botë, deri tani”.
Dritat e skenës duhet t’u përkasin njerëzve të tjerë, – shtoi katalanasi. “Mesfushori mbajtës duhet të mendojë për pjesën tjetër të ekipit dhe nuk pret njohje. Por të gjithë bashkëlojtarët dhe stafi, të gjithë e dinë se sa i rëndësishëm dhe vendimtar është ai. Shumë i rëndësishëm për ne.”
Trajneri i kombëtares, Luis de la Fuente e përshkroi Rodri si “një kompjuter perfekt, i cili administron gjithçka, emocionet, të gjitha momentet në një mënyrë magjike” gjatë fushatës drithëruese të Spanjës në Kampionatin Evropian.
Dhe pasi La Roja mundi Anglinë në finale pavarësisht se Lojtari i Turneut Rodri u detyrua të largohej i dëmtuar në pjesën e parë, De La Fuente shkoi një hap më tej se Guardiola, duke e quajtur mesfushorin “lojtari më i mirë në botë”. Kjo deklaratë u pasua nga një lutje: “Të lutem, jepini atij Topin e Artë tani!” /
