Luftimet vdekjeprurëse midis Izraelit dhe grupeve militante të mbështetura nga Irani janë shtuar në javët e fundit ndërsa ushtria izraelite ka zgjeruar sulmet ndaj Hezbollahut në Liban dhe Houthis në Jemen.
Së bashku me Hamasin, i cili sulmoi Izraelin më 7 tetor, Hezbollahu dhe Houthi janë pjesë e “Boshtit të Rezistencës” të Iranit, një aleancë e milicive islamike që përfshin Irakun, Sirinë, Libanin, Gazën dhe Jemenin.
Këto grupe i japin Iranit thellësi strategjike kundër armiqve të tij. Në mbështetje të Hamasit dhe palestinezëve, Hezbollahu dhe Houthi kanë nisur sulme të rregullta ndaj Izraelit gjatë vitit të kaluar. Ata janë zotuar të vazhdojnë të luftojnë derisa të përfundojë lufta në Gaza. Ja çfarë duhet të dini për këto grupe:
Hezbollah: Grupi libanez besohet të jetë grupi joshtetëror më i armatosur në botë. Grupi shiit u shfaq pas pushtimit Izraelit në Liban në vitin 1982. Izraeli e pushtoi Libanin jugor për 22 vjet përpara se të dëbohej nga Hezbollahu. Në vitin 2006, Hezbollahu dhe Izraeli zhvilluan një luftë për 34 ditë, e cila përfundoi pa asnjë fitues të qartë.
Houthis: Grupi shiit, i përforcuar nga armët dhe teknologjia iraniane, ka luftuar forcat e mbështetura nga Arabia Saudite për më shumë se një dekadë në luftën civile të Jemenit. Ndërsa Houthi nuk përbëjnë aq shumë kërcënim për Izraelin sa Hamasi dhe Hezbollahu, ata kanë bërë shumë sulme gjatë vitit të kaluar në Detin e Kuq, kundër anijeve tregtare që i konsideronin të lidhura me Izraelin dhe aleatët e tij, duke kërcënuar të pengojnë tregtinë globale.
Hamas: Grupi u shfaq në vitin 1987 si një degë e Vëllazërisë Myslimane, një grup islamik sunit nga Egjipti. Hamasi e konsideron Izraelin një fuqi pushtuese dhe qëllimi i tij është të çlirojë territoret palestineze. Hamasi merr fonde, armë dhe trajnime nga Irani. Shtetet e Bashkuara i kanë cilësuar Hamasin, Houthis dhe Hezbollahun si organizata terroriste. / bota.al
