Izraeli po godet në shumë fronte. Herët mëngjesin e sotëm, forcat ushtarake izraelite kanë goditur Bejrutin qendror për herë të parë që nga viti 2006. Po ashtu, sulmet e rënda ajrore izraelite me dhjetëra avionë bombarduan Jemenin orë më parë në një sulm me rreze të gjatë.
Sulmi i fundit erdhi pasi OKB-ja raportoi se rreth 100,000 njerëz ishin larguar nga Libani për në Siri që nga përshkallëzimi i fundit i luftës dhe CNN citoi një figurë të paidentifikuar në administratën Biden që pohonte se SHBA ka ndryshuar qëndrimin e saj ushtarak në Lindjen e Mesme, mes shqetësimeve se Irani mund të sulmojë Izraelin si kundërpërgjigje për vrasjen e liderit të Hezbollahut, Sayyed Hassan Nasrallah të premten.
Sulmi i Bejrutit kishte në shënjestër tre figura të larta të Frontit Popullor për Çlirimin e Palestinës (PFLP), një grup i lidhur me një seri rrëmbimesh avionësh në vitet 1970. Fraksioni i krahut të majtë, i cili nuk ka luajtur një rol të rëndësishëm në konfliktin e vazhdueshëm midis Izraelit dhe grupit militant shiit Hezbollah, tha se komandantët e tij ushtarakë dhe të sigurisë në Liban, si dhe një anëtar i tretë, u vranë në sulmin e fundit.
Sulmet izraelite në periferitë jugore të Bejrutit, një bastion i Hezbollahut dhe gjetkë vazhduan të hënën ndërsa grupi militant palestinez Hamas tha se udhëheqësi i tij në Liban u vra në jug të vendit. Sulmi ajror i së hënës vjen pasi ministria e shëndetësisë e Libanit tha se 105 njerëz ishin vrarë dhe 359 të tjerë u plagosën nga sulmet izraelite në të gjithë vendin të dielën.
Më shumë se 1,000 libanezë janë vrarë dhe 6,000 janë plagosur në dy javët e fundit, thoshte deklarata, por pa thënë se sa ishin civilë. Qeveria tha se një milion njerëz – një e pesta e popullsisë – janë larguar nga shtëpitë e tyre. / bota.al
