Ne jemi njerëz sepse jemi në ndërveprim të vazhdueshëm me të tjerët. Për këtë arsye na duket kaq shqetësuese dhe e dëmshme vuajtja e një qëndrimi indiferent. Indiferenca shfaqet kur një person trajton një tjetër sikur të mos ekzistojnë, duke i injoruar ose duke e kufizuar bisedën në përgjigje të thjeshta.
Më poshtë do të listojmë disa nga efektet e dëmshme që mund të shkaktojë indiferenca:
– Shkakton tension të fortë mendor. Nëse nuk e dimë se çfarë mendon personi tjetër, nëse nuk mund ta “lexojmë”, mendja jonë do të bëjë përpjekje për ta deshifruar atë përmes informacionit të pakët ose aspak të disponueshëm. Në planin afatmesëm dhe afatgjatë, ky qëndrim shkakton ankth, kërkim të përgjigjeve të reja dhe stres, që rezulton në tension mendor.
– Gjeneron konfuzion. Indiferenca thyen një mekanizëm elementar të ndërgjegjes njerëzore: procesin e veprimit dhe reagimit. Sa herë që silleni në një mënyrë të caktuar, atëherë prisni që personi tjetër të veprojë në përputhje me rrethanat. Nëse ndonjëherë reagimi nuk është ai që prisni, të kuptuarit e mungesës totale të tij është edhe më e vështirë. Komunikimi bëhet i pamundur dhe përpjekja për ndërveprim bëhet e detyruar dhe rraskapitëse.
– Nxit vetëbesim të ulët. Duke mos marrë asnjë lloj përgjigjeje nga ky person, çdo njohuri që mund të nxjerrim prej tij eliminohet. Gjatë fazave të formimit të personalitetit, kjo mund të ketë pasoja serioze në imazhin që kemi për veten tonë. Ekziston mundësia që personi që pëson indiferencën, të arrijë të besojë se nuk ia vlen të bashkëveprosh me ta, duke gjeneruar pasiguri të fortë.
Si të reagoni kur përballeni me dikë që ju trajton me indiferencë?
Edhe pse askush nuk është i detyruar t’ju kushtojë vëmendje, ne gjithmonë aspirojmë të krijojmë një marrëdhënie ndërveprimi të vazhdueshëm me të dashurit tanë: familjen, miqtë dhe partnerët. Nëse merrni indiferencë nga dikush i rëndësishëm për ju, përpiquni t’ua bëni të ditur.
Mundohuni t’i shpjegoni situatën nga një këndvështrim objektiv, madje duke i bërë thirrje ndjenjave tuaja. Do të jetë e nevojshme t’i përshkruani atij se si ju bën të ndiheni ky qëndrim, duke i kërkuar që të mendojë pak për këtë.
Do të ketë njerëz që thjesht nuk mund ta braktisin këtë mënyrë indiferente të trajtimit të të tjerëve. Nëse është dikush që ju intereson shumë, do t’ju duhet të bëni një përpjekje për të kërkuar një ndërveprim. Është e rëndësishme që ta bëni këtë pak nga pak, gradualisht, përndryshe rrezikoni të gjeneroni një “rebound effect”, duke rritur indiferencën e tij ndaj jush. Ka shumë të ngjarë që njerëz të tillë të kenë përjetuar një trajtim të tillë gjatë fëmijërisë ose adoleshencës së tyre.
Nëse ajo që u propozua më sipër nuk ju ka sjellë rezultate dhe mendoni se po filloni të vuani efektet e dëmshme të indiferencës, gjëja më e shëndetshme për të bërë do të ishte të distancoheni nga ata njerëz. Nëse mendoni se pasojat e dëmshme po ndodhin tashmë brenda jush, bëhet urgjente të hiqni dorë nga mbajtja e një marrëdhënieje të ngushtë me njerëz të tillë, duke kërkuar të tjerët për të cilët jeni të rëndësishëm. Qasuni grupeve në të cilat ju dëgjojnë dhe mënyra juaj e të qenit vlerësohet. / bota.al
