Lehtësimi është i barabartë me shqetësimin që kishin ndjerë gjatë javëve të fundit. Është e jashtëzakonshme – shkroi Jules Koundé, mbrojtësi i kombëtares franceze të futbollit e cila ka arritur në gjysmëfinalet e Euro 2024. Urime të gjithë francezëve që janë mobilizuar për të siguruar që ky vend i bukur që është Franca të mos e gjejë veten të qeverisur nga e djathta ekstreme”.
Dhe të mendosh se e diela e zgjedhjeve, në vendqëndrimin ku Franca po përgatit gjysmëfinalen ndaj Spanjës, nuk nisi me zgjedhjet si temë kryesore. Mes videove dhe analizave taktike u fol më së shumti për futbollin. Por në mbrëmje shfaqja e rezultateve të para i bëri të pashmangshme komentet dhe kënaqësinë. Nga lojtarët dhe stafi që mundën të votonin – një numër më i vogël se në raundin e parë, sepse në disa zona rezultati ishte tashmë përfundimtar – e bënë përsëri përmes instrumentit të delegimit (edhe në raundin e parë lojtarët votuan në një përqindje më të lartë se mesatarja, sado e lartë, e vendit).
Gjatë konferencës për shtyp në stadiumin e Paderbornit, raporton Le Parisien, mesfushori i Monacos, Youssouf Fofana, kishte shmangur për pak çaste kufizimin e heshtjes zgjedhore me një frazë të vetme: “Situata është shqetësuese”. Kështu doli edhe një herë se në kombëtaren franceze të futbollit ekzistonte një grup, jo pakicë, i rreshtuar haptaz kundër të djathtës ekstreme të Rassemblement National. I udhëhequr pa mëdyshje nga kampioni më i famshëm. Kylian Mbappé, sulmuesi i ri i Real Madridit, kishte shpresuar në TV live, para ndeshjes së 1/16-ave kundër Portugalisë, “që Franca të mos përfundojë në duart e atyre atje”. Përgjigja nuk vonoi.
Kritikët më të pamëshirshëm të futbollit, duke aluduar për katër ndeshjet e tij të fundit sipas tyre të dobëta, argumentuan me sarkazëm se kapiteni i Les Bleus nuk ka zbritur ende në fushë në Kampionatin Evropian, por nga ana tjetër e ka bërë me dëshirë në fushatën elektorale. Dhe liderja e Rassemblement National Marine Le Pen ishte e ashpër në një intervistë për CNN: “Mbappé është një lojtar i madh, por francezëve u ka ardhur në majë të hundës duke marrë këshilla për votën nga aktorët, futbollistët dhe këngëtarët, miliarderë që jetojnë jashtë”. Disa sondazhe treguan se 52% e francezëve ishin kundër marrjes së një qëndrimi nga ana e ekipit.
“Shpresojmë që pas 7 korrikut të jemi ende krenarë që e veshim këtë fanellë”, kishte thënë numri 10 i Francës. Dhe tani mund të flitet ndoshta edhe për një efekt Mbappé në votime. Nëse sot në Mynih është ai që do të marrë pjesë në konferencën për shtyp para gjysmëfinales me trajnerin Deschamps, vështirë se do të zgjedhë të jetë diplomatik. / bota.al
